Dai na de hkying 4 hta Hpakant Dapnu Kawng kaw na Laknak kaba ni hte Mawmau Bum maga de gap bun ai majaw, Mung Shawa dum n ta hkra ai lam nga ai hpe ginra masha ni kaw na chye lu ai.
April 10 ya shana de hkying 3:45 PM hte 4:00 PM lapran kaw Mawmau Bum de laknak kaba 3 lang gap bun ai majaw, mare kaw wa hkrat ang ai nga, ginra masha langai KNG de n dai zawn tsun dan wa ai re.
“Dai na de hkying 3:45 hte 4:00 lapran kaw na Mawmau Bum de laknak kaba 3 lang bai gap bun ai majaw, Mare baw hte Mare ka-ang hte yang kaw wa hkrat ang ai, Mung shawa gaw yawng hprawng ma sai re majaw, masha gaw hpa n ra ai, n ta chyawm loi hkra ai zawn nga ai,” nga tsun dan ai re.
Myen Hpyen ni Hpakant Mawmau Bum maga de mani Jet Nbungli 2 hte 3 lang da bat wa gap ai sha n ga, Hpakant Tatma kawng kaw na mung laknak kaba ni gap bun wa ai hpang, shana de hkying 6 ram kaw lagaw lam hku hpyen n-gun kaba the htu gasat wa ai lam the seng na ginra masha wa n dai zawn matut tsun dan da ai re.
“Mani gaw Jet Nbungli 2 hte 3 lang da bat, Bawm wa jahkrat bun ai sha n ga Jak Sinat ni the mung wa gap dumbre kau da ai, dai hpang kaw na Tatma kawng na Laknak kaba ding yang gap shapyen bun ngut ai hpang, shana hkying 6 ram hta Hpyen n-gun laba manu mana law ai hte htim gasat wa ai majaw, anhte maga na ni kanoi pyi she hting nut kau ra mat hkra hkap shingla gasat ai, Myen ni bai zim mat na she re nga,” nga tsun dan ai re.
Dai na mung Myen ni Mawwan kaji maga de bai htu shadut htim gasat wa na masa nga ai majaw, Hpyen masa ding yang matut shaja hkat taw ai lam matut tsun dan ai re.
Mawmau Bum buga hpung masha ni gaw, dai ginra de, maning kaw na hpyen n-gun htu wa ai majaw, Namhpyit mare de sa hprawng yen taw ai rai nga ai.
Namhpyit kaw sa hprawng yen taw ai ten, Myen hpyen dap KIA PDF ni bai gap gasat hkat wa ai majaw, Mani April 9 ya shani kaw na, Myitkyina de hprawng yen sai re lam chye lu ai.
Ya ten Hpakant kaw Myen Hpyen n-gun 200 daram jat bang da nna, shan hte tat sum kau ai Sut Bum, Nma Yang de bai htim gasat na hkyen taw ai lam re nga ginra masha nit sun maram da ai re.
Myen Hpyen ni, Mawwan Kyuhpyi Bum hte Hpungkyi Jawng ni kaw rawng nga nna, Ndai laman bai du lung wa ai Pyithutsit ni hte pawng nna, KIA ni nga ai Sut Bum Mawwan Kaji de bai htim gasat taw nga ai mung rai nga ai.
