Hpakant Sengtawng mare kaw rim woi hkrum ai Uru Daily News Editor Tar Lin Mg bai lawt pru wa sai lam, chye lu ai.
Salang Tar Lin Mg hpe March 17 ya shana maga hkying daram hta manang langai the Sengtawng mare maga hkawm chyai ai ten, lam lapan laknak lang wunpung ni rim woi mat ai hpang, dai na maga bai lawt pru wa ai rai nga ai.
“bai lawt pru wa sai, Dai na hkying 5 ram hta lawt sai, ya sa tau la taw ai nga,” shi n ta masha ni tsun dan wa ai re.
Salang Tar Lin Mg gaw, Hpakant ginra byin ai shiga ni hpe shi nan ka ai zawn, shiga dap shagu hpe htai ya ai lam galaw ai wa re majaw, mung shawa yawng kaw na mung, shi hpe lawan bai dat y ana matu online n tsa hkan jawm hpyi shawn wa ai hpang, lani lana mi na ai hpang bai dat ya ai rai nga ai.
Ya na zawn Hpakant ginra na Shi htawn ai langai hpe rim woi mat ai masa lam the seng na, dai ginra na lit nga ai salang langai n dai zawn hpaji jaw tsun da ai re.
“Salang Tar Lin Mg rim woi hkrum ai lam the seng na tsun ga nga yang, shi gaw shiga magam bungli galaw taw ai wa re. ngut na shi gaw rawt malan wuhpung maga de tsap nna, KIA PDF ni the lata gindun nna bungli galaw taw nga ai wa re, rawt malan magam lit hta nga yang mung grai shakut shang lawm ai wa re. tsun mayu ai gaw manghkang langai byin pru was ai nga yang masha hpe rim na adup abyen na ngu ai ladat hte n re ai sha a tsawm pri nem hkra shawng jahta la nna, a tsawm rai ahkyak la ging ai ngu tsun mayu ai law,” nga tsun da ai re.
Salang Tar Lin Mg hpe rim woi mat ai gaw KIA Hpyendap n ani rai nna, dai na maga de mawdaw the lam daw mi kaw bai sa sa kau da ya ai lam chye lu ai.
Dai Salang wa gaw, lai wa sai 2025 ning hta mung KIA maga kalang rim woi yu sai Shi sawk Salang wa mung rai nga ai.
Ndai kalang bai rim woi hkrum ai lam gaw, Shanglawt ni Hpyen lahkawn ai lam the seng nna, shi facebook n tsa hta dinglun ka mara da ai majaw, rim woi ai masa re lam shi manang ni tsun maram da ai re.
