Jinghpaw Mung Hkringmang Daju magam lit hpe, Daru magam zing Gumshem Min Aung Hlaing lata san dat ai Salang Hkyet Hting Nan hpe sha, Jinghpaw Mung rapdaw kaw ninghkap ai datkasa langai mung n nga ai hte Jinghpaw Mung Hkringmang Magam lit hpe bai kahtap shatsam hkrum wa ai lam chye lu ai re.
Jinghpaw Mung rapdaw hpawng lamang hta Rapdaw ningbaw Rawang Jung hte du sa ai rapdaw dat kasa marai 45 yawng sa du shang lawm nna, jawm masat shagrin dat ai re lam chye lu ai.
April praw 5 ya shani galaw ai Jinghpaw Mung rapdaw hpawng lamang hta, Hkringmang daju hpe lata san la wa ai sha n ga, Mungdaw hkringmang marai 7 hte Mungdaw Tara agyi daju marai 3 hpe mung jawm masat shagrin la lu wa ai nga, Jinghpaw mung Asuya Facebook shiga hta n dau da ai re.
Jinghpaw Mung Asuya Wuhpung ningnan hpaw ai hta Hkringmang Daju shara kaw Salang Hkyet Hting Nan, လုံခြုံရေးနှင့် နယ်စပ်ရေးရာဝန်ကြီးဌာန kaw ဗိုလ်မှူးကြီး ကျော်သူရ, စီမံကိန်း၊ စီးပွားရေးနှင့် ဘဏ္ဍာရေးဝန်ကြီးဌာန shara kaw Salang Ting Sau, လူမှုရေးရာဝန်ကြီးဌာန shara kaw Salang Kyaw Min Khaing, လျှပ်စစ်စွမ်းအင်၊ စက်မှုနှင့်လမ်းပန်းဆက်သွယ်ရေးဝန်ကြီးဌာန shara kaw Salang Aung Naing, စိုက်ပျိုးရေးမွေးမြူရေးနှင့်ဆည်မြောင်းဝန်ကြီးဌာန shara kaw Salang Chang Tang Khin, သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန shara kaw Dr Aung Win, စည်ပင်သာယာရေးဝန်ကြီးဌာန shara kaw Salang Ye Yint Swe ni hpe lata shatsam wa ai lam chye lu ai.
Salang Hkyet Hting Nan gaw, lai wa sai 2010 Ning ra lata poi ten kaw na shang shing jawng wa ai Salang langai mung rai nga ai.
2010 ning ra lata poi ten hta mung, Myen Hpyen Party rai nga ai, USDP party hte pawng hpawm party galaw da ai စည်းလုံးညီညွတ်ရေးနှင့် ဒီမိုကရေစီပါတီ UDPKS kaw, N Jang Yang Mung Shawa Rapdaw kaw na shang shingjawng dang wa ai re.
Dai hpang 2015 ning ra lata poi hta Jinghpaw Mung Masat (2) Amysha Rapdaw Datkasa shara hta shang shing jawng lawm wa ai re.
2015 ra lata poi hta NLD Party hpe Sindan pa Mun 3 jan hte sum mat ai majaw, No. 2 law dik lu wa ai lam sagawn chye lu ai.
Salang Hkyet Hting Nan gaw, Sut masa Hpaga lauban la langai rai nna, Myen Hpyen Dap hte Wunpawng Mungdan Shanglawt Hpung laknak lang wuhpung lahkawng maga hte pri nem hkra chye kanawn mazum ai Salang langai re lam shi the ni nawn ai Salang langai KNG de n dai zawn tsun dan wa ai re.
“Salang Hkyet Hting Nan ngu wa gaw grai manyen ai la wa re gaw, gadai hte mung prinem dik ai hku chye tsun shaga ai, dai majaw moi hpyen dap naw up ai prat kaw na rai tim shara kaja lu ai majaw, dai ni ten du hkra ကောင်းစား taw ai la wa rai nga ai, shi gaw 2011 Majan bai byin wa ai ten mung shi shara grai lu sai gaw, ban hte ban Myen hte hkrai pawng na Lauban taw ai la rai nga ai,” nga tsun ai re.
2011 ning Myen Hpyen dap hte KIA majan bai byin wa ai ten, lapran salang tai nna, simsa lam hpe woi tam shakut ai hta mung woi awn shang lawm wa sai re.
Dai zawn lapran salang tai ya let, sut hpaga lam shagu hta ahkaw ahkang ginjang grai lu wa ai lai wa sai hpe mung sagawn chye lu ai re.
Hpakant kaw Lungseng htu ai lam sha n ga, Miwa de gunrai htaw shalai ahkang ni hte galaw sha lai wa ai lam sagawn chye lu ai re.
Mung Masa daru magam ahkang aya a majaw, lai sai ten hkan Mung shawa ni galaw wa ai Ninghkap masat n htoi lamang shagu ni hta shang lawm wa ai hpe mung mu mada lu wa ai re.
2021 ning Gumshem Myen Hpyen dap daru magam zing kau ai hpang, Myen Hpyen hte Pri nem hkra chye tsun chye nga ai Salang Hkyet Hting Nan hpe Jinghpaw mung hkringmang daju bai lata san wa ai rai nga ai.
Myen Hpyen daru magam zing kau ai hpang, Mung Shawa ni a n sen hpe shingdu gayin kau nna, shi a dinghku shi a jinghku ni a nga mu nga mai lam hpe hkrai myit nna, Myen Hpyen dap tsun ai lam ni hpe hkrai hkan shatup galaw mat wa ai rai nga ai.
Ya Mali Nmai Zup madim masing lam hpe lai wa sai ten, shi nan ninghkap wa ai rai tim, Ya shi daru magam ahkang aya bai lu wa ai ten, Mali Zup madim hpe galaw na myit hkrum wa ai sha n ga, Mung shawa ningmu jahpaw hkaw tsun hpawng lamang ni hpe mung hkan galaw taw nga ai re.
