Ndai laman Hpakant de Myen hpyen n gun bai jat taw nga ai majaw, lam lapran hpyen masa shaja hkat taw ai nga ginra masha ni tsun dan wa ai kaw na chye lu ai.
Mani April praw 6 ya shani Min Zay Thant woi awn ai Pyithutsit hpyen hpung ni lung wa ai ten, lam lapran kaw shim lam la ya ai Myen hpyen dap the KIA lapran gap gasat hkat ai lam ni nga wa ai hpe chye lu ai.
Lawa kaw na lung wa ai Warazup Pyithutsit hpung ni hpe Hpakant Myen Hpyen dap hpung ni lam lapran sa tau la nna, Hpakant lam kaba hku n lai ai sha, Malang Dung mare maga hku na Uru hka hpe rap na Hpakant de du lung wa ai lam KIA hte ni nawn ai Salang langai KNG Shiga de n dai zawn tsun dan wa ai re.
“Lay Pyin Sha It Yang kaw na Hkunsa Kung, Malangdung hku na Hpakant de gayin shang wa ma ai, dai ni shani ka-ang hkying 11 ten ram kaw na gaw Sha It Yang (လယ်ပြင်) Bawm Yam Dap na Myen Hpyen Mawdaw 3, hpyen n-gun 80 ram Lawnghkang de man yawng lung wa nna, Lay Pyin Hpaji Jawng, moi na mahkrai dingsa shara hte လေးမျက်နှာ ဘုရားကုန်း ni kaw shara wa la da ma sai,” nga tsun dan ai re.
Dai ni shani ka-ang ten hta mung Lawnghkang mare kaw masha langai bai gap sat da ai lam matut chye lu ai re.
“dai ni bai gap sat da ai gaw, mung shawa kun? Hpyenla re kun a tsawm tup hkrak rai n chye ai,”nga matut tsun dan wa ai re.
Namhpyit Tar Yar Kung na mung shawa ni ya ten, Sengra mare ningnan maga de hprawng yen taw nga ai lam matut chye lu ai.
Myen hpyen ni Lawnghkang hte Namhpyit Mawsiza grup yin hta hpyen masa shaja hkat taw ai majaw, dai ginra na mung shawa yawng, hprawng lam n mu n ta kata kaw hkrai mai byin ai hku na makoi rawng taw ai lam chye lu ai.
Myen Hpyenla ni dai ni Namhpyit Mare na Hkanan Lusha seng kaw rawng taw nga ai lam, ginra masha ni tsun shana dan wa ai re.
Lawa de na lung wa ai hpyen hpung ni hpe sa tau ai majaw, mana maga de Lawnghkang makau grup yin kaw laknak kaji kaba gap shangoi ai lam ni byin wa ai re.
Ya ten Myen Hpyen hpung ni Moi na Lawng Hkang Hpakant Mawdaw Lam kaba maga the Namhpyit mare ni hkan Myen ni shara la da nna, KIA PDF dap ni gaw, Lawnghkang Goft Pa hte Lupwa kawng maga de shara la da na, hpyen masa matut shaja hkat taw ai lam chye lu ai re.
