Kokang MNDAA Dap Jinghku Rawt Malan HPung TNLA Ni Gasat Zing Da ai Kutkai Mare hpe Majan Baw Gasat Sai
Jinghku Rawt Malan Hpung shada rai nga ai Kokang MNDAA dap maga na dai hpawt manap jau Kutkai pa hpe Drone Laknak kaba ni gap gasat hpang sai nga, ginra masha ni tsun ai re.
March 14 ya jahpawt hkying 10 ten daram kaw na, Kokang Miwa hpyenla ni Kutkai pa Man Pying Mare maga hku na laknak kaba, Drone ni hte gap gasat shang wa ai re lam ginra masha langai KNG de n dai zawn tsun dan wa ai re.
“Dai hpawt hkying 10 ram kaw na Kokang hpyenla ni maga shawng laknak kaba Drone ni hte gap gasat ai majaw, Myo ting laknak kaba n sen hkrai kadu mat na mung shawa ni mung gara de hprawng na re n chye, gat seng ni mung yawng pat, gadai mung gadai shim lum ai shara hkan koi yen taw nga ai,” nga tsun dan wa ai re.
Kokang Miwa maga de na shawng Kutkai hpe htim gasat wa ai rai nna, Kutkai pa hta Kokang MNDAA hte Balawng TNLA ni lapran lam kaba n tsa CCTV shakap ai kaw na hpang wa ai manghkang gaw lani hte lani grau kaba wa ai hpang, ya dai hpawt manap kaw na laknak hte gap gasat ai lam hpang wa ai mung rai nga ai.
Lai wa sai shata mi jan hta, Kokang ni Kutkai lam kaba n tsa hkan CCTV shakap wa ai majaw, TNLA maga yawng hkan adup jahten kau ya wa ai rai nga ai.
Dai hpang Balawng TNLA maga Kutkai kaw nga ai Kokang rung yawng hpe hkan pat, dawng hkawn ni hkan jahkrat rai nna, hpyenla rung magam gun ni hpe gaw mare shinggan de sa htaw sa kau ai lam ni galaw wa ai rai nga ai.
Dai kaw na hpang wa ai jinghku rawt malan shada lapran na manghkang lam gaw lani hte lani yawm wa ai lam n nga grau grau kaba wa ai majaw, ya na zawn gap gasat hkat ai madang du ai re lam ginra masha ni tsun dan ai re.
Kokang Miwa maga na gaw, Kutkai myo kata the myo shinggan hkan na dap shara n kau hpe gaw gasat shachyut kau lu sai rai nna, Kutkai Byuha kawng hpe laja lana matut htim gasat taw nga ai lam chye lu ai re.
Kutkai pa hpe Balawng TNLA maga 2024 January shata hta Myen Hpyen lata kaw na gasat zing madu la lu wa ai mung rai nga ai.
