Hkyen Bum Pawt Mayan Majan Byin Nga Ai Hta Nbungli Bawm Ni hte Mung Sa Jahkrat Bun Nga
Jinghpaw Mung Dingdung Hkyen Bum Pawt mayan rai nga ai, Shing Hkawng Masat 30 Jarit maga de htu shadut sa wa ai Myen Hpyen Pyithutsit pawng hpawm dap hte KIA Dap lapran Majan Byin taw nga ai lam, shawng lam hpyen magam gun ni tsun ai re.
Shing Hkawng Masat (30) Miwa Jarit Sharkarti mare makau hta March 11 ya shani mung Majan matut byin nga ai majaw, dai ginra hta n dai laman majan gap gasat hkat taw ai n htoi 3 ya rai wa sai lam, shawng lam hpyen magam gun langai KNG de n dai zawn tsun dan ai re.
“Dai ni mung Majan byin ai shara de Nbungli the sa gap ai, n dai laman Majan byin ai kaw Nbungli the sa gap ai 2,3 lang rai sai Nbungli hte sa gap ai hpang, Pyithutsit ni lagaw dap hte bai htu lung wa ai majaw, Majan byin taw nga ai re.” nga tsun dan ai re.
Lai wa sai February shata kaw na Myen Hpyen dap gaw, Pyithutsit ni hpe atit anang hpyen rim lahkawn woi la nna, shawng lam de sa shangun nna, KIA dap shara hpe htim gasat shangun taw ai lam mung rai nga ai.
Ya majan byin taw ai shara gaw, lai sai ten Pyithutsit ni dung ai shara hpe KPF the KIA Pawng hpawm nna htim gasat zing kau ai shara hpe Myen Hpyen dap hte Pyithutsit maga ya kalang bai htim gasat wa ai lam mung rai nga ai.
Ndai kalang gaw Myen Hpyen Pyithutsit maga na htim gasat ai hpe KIA KPF maga hkap shingla gasat taw ai majan re majaw, gap dat hkring dat rai nna, Hpyen masa shaja hkat taw ai masa re lam chye lu ai.
Myen Hpyen maga Nbungli hte bawm jahkring hkring sa jahkrat bun ai majaw, Shing Hkawng makau grup yin mare kahtawng hkan na mung shawa si hkala ai lam nga ai rai tim, gade daram gara hku si hkala ai ngu hpe a tsawm tup hkrak n chye lu ai re.
Hkyen Bum pawt mayan de KIA the KPF pawng hpawm dap ni gaw 2025 shaning htum maga kaw na Pyithutsit dap shara n kau hpe gasat maden jat mat wa ai mung rai nga ai.
Hkyen Bum Pawt mayan de KIA htim gasat shara la wa ai majaw, Myen Hpyen dap gaw Hkawnglanhpu hte Putao ginra hkan na na mung shawa ni hpe Pyithutsit hpyenla atit anang rim lahkawn woi la nna, shawng lam da sa taw ai masa lam the seng na, shawng lam magam gun wa n dai zawn matut tsun dan da ai re.
“Majan Chyawm gaw grai wa laja lana byin ai hku gaw n re. Gap dat hkring dat rai kachyi kajaw byin taw ai re ga rai nga ai. Anhte maga na gaw, lai wa sai December shata kaw na htim gasat ai lam n galaw sai, ya n dai laman gaw shan hte maga na bai htim gasat lung wa taw ai ga rai nga ai. Ra ai hpyen n gun ni hpe Putao hkan atit anang rim lahkawn na shawng lam de sa taw ai ga rai nga ai,” nga matut tsun dan ai re.
Wunpawng Mungdan Shanglawt Hpyen Dap KIA woi awn ai KPF pawng hpawm dap ni Shing Hkawng, Hkawnglanhpu ginra ni de du hkra htim gasat lung wa na shiga a majaw, Myen Hpyen dap maga Pyithutsit ni hpe jai lang nna, hkap shingla gasat shangun taw ai lam chye lu ai.
Myen hpyen dap gaw ya ten Putao kaw Nbungli tawn da nna, Hkyen Bum pawt mayan ni de hpyen laknak masha n gun ding yang htaw sa taw ai lam chye lu ai re.
