Myen Hpyen Dap hte Pyithutsit Dap ni Mashi Kahtawng Mung Shawa Arung Arai Lagu Htaw la nga
Hpakant Mashi Kahtawng Kyuhpyi Bum Pawt Mayan hta shara la nga ai Pyithutsit ni Mung Shawa Arung Arai ni hpe lagu htaw la taw ai nga, ginra amyu shayi langai KNG de tsun dan ai re.
Mashi Kahtawng Kyuhpyi bum de lai wa sai January kaw na htim gasat wa ai gaw, hkring dat gap dat rai hpyen masa shaja hkat ai dai ni ten du hkra re lam chye lu ai.
Nnan htim gasat ai 10 ya jan na ai hpang Mashi Kahtawng, Ginwang Staff rung dum n ta hte Mung Shawa dum n ta hkan na arung arai ni hpe Hpakant Tatma kawng de lagu htaw la ai lam galaw wa ai hpang, ya kalang bai lagu htaw la taw sai nga, ginra amyu shayi langai KNG de n dai zawn tsun dan wa ai re.
“ Mashi Kahtawng grup grup yin yin Myen Hpyen dap the Pyithutsit ni hkrai re, Moi ya na lang Myen ni arung arai grai lagu la wa ai majaw, Mare Myitsu kanu kawa na Hpyendap kawng de lung na wa tsun hpyi shawn yu ai rai tim, n hkraw ya rai di gaw, ya kalang bai lagu htaw la taw sai, Nta n tsa na Yehke Titta, Sitti dung lahkum ni yawng lam n tsa kaw hpai da masai,” nga tsun ai re.
Myen HPyen dap hte Pyithutsit Mung Shawa arung arai lagu htaw la taw ai majaw, ginra masha ni Hpakant Tatma kawng de lung nna, arung arai naw shaw la na matu ahkang wa hpyi yu ai rai tim, Myen HPyen maga na ahkang n jaw wa ai hpe chye lu ai.
Dai zawn ahkang n jaw ai hpang, dai makau kaw nga taw ai Pyithutsit ni gaw, Mani shawng shani kaw na mung shawa arung arai ni hpe Mawdaw lam kaba makau kaw bai shaw da nna, htaw la na hkyen taw sai lam matut chye lu ai re.
Dai hpawt Hkying 10 chyen ten daram kaw na Hpakant Tatma kawng na laknak kaba laja lana bai gap bun taw ai majaw, Majan bai byin taw ai lam chye lu ai.
Dai na maga de hkying 3 ram ten hta Maw Maw Layang kaw lanak kaba wa hkrat ai majaw Mung Shawa lahkawng hkala hkrum wa ai lam chye lu ai.
Ya ten dai grup yin hta shamu taw ai ni gaw, Sam Hkyeng Pyithutsit ni law malawng rai nna, Wara Zup, Zahkung Ting Ying Pyithutsit hpung ni re lam chye lu ai.
Dai kaw nga ai Pyithutsit ni gaw, lai wa sai laban ya shana စနေအသင်း Nawku jawng makau na Mung Shawa dum n ta wan jahten ai lam galaw wa ai re.
