Myen Hpyen Dap hte Pyithutsit ni, Mashi Kahtawng Mare kaw, Mare Salang galaw lai wa yu sai Slg အောင်သင့် a n ta hpe wan sa nat ai majaw, dai makau na dum n ta 3 mung hkru lawm mat ai lam Mashi Kahtawng Ginra masha ni kaw na chye lu ai.
March 8 ya shana Hkying 6 :45 aten hta, Myen Hpyen dap hte Pyithutsit dap ni ngu maram lu ai hpyen hpung ni gaw, Hpakant Mashi Kahtawng “Cat Back Hold” Service Rung shawng kawng n tsa na, စနေအသင်း Nawku jawng shingdu na mung Shawa dum nta nat ai majaw, dai makau na dum n ta masum yawng tsep kawp la hpa n nga hkra hkru hten mat ai lam ginra amyu shayi langai KNG Shiga dap de n dai zawn tsun dan ai re.
“Mana de my inaw mu yang she rai sai, Hkying 6 Minute 45 ram kaw rai na re. Nnan gaw Wan hkut sha loi lun lun re kaw na jahkring rai yang gaw wan shinglet hte grai hkru wa sai gaw Hpakant Mashi Kahtawng “Cat Back Hold Service” Rung shawng kawng n tsa na, စနေအသင်း Nawku jawng shingdu na mung Shawa dum nta ni rai nga ai, n ta 3, 4 yawng hpa n ngam hkra hkru mat ai,” nga tsun ai re.
Ya ten Myen Hpyen dap hte Pyithutsit dap ni gaw, Mashi Kahtawng Kyuhpyi bum hpe htim gasat taw nga ai majaw, dai makau grup yin ni hta, Myen Hpyen dap hte Pyithutsit dap ni hkrai shamu taw ai shara re majaw, Myen Hpyen dap the Pyithutsit ni nat ai sha mai byin ai nga, ginra masha ni tsun maram da ai re.
Ndai laman, Mashi Kahtawng grup yin ni hta, Myen HPyen dap Pyithutsit ni pawng nna, Mung Shawa arung arai ni hpe kalang bai hkan lagu htaw la taw ai lam chye lu ai.
Ndai kalang bai hkan lagu htaw ai hta gaw, lai sai kalang n ra na tawn da ai Shat gawk arung arai ni yawng hpe du hkra kalang bai hkan lagu htaw la taw ai lam tsun ai re.
Myen Hpyen dap hte Pyithtutsit dap ni ya na zawn mung Shawa arung arai hkan lagu htaw la ngut ai hpang, laknak kaba Nbungli ni laja lana htim gasat wa na masa nga ai lam ginra masha ni matut tsun da ai re.
Lai wa sai bat kru ya Shani ka-ang hkying 12 chyen ten daram hta Myen Hpyen Jet Nbungli Langai hte Hpakant Tamahkan Mare na Kyaw Naing na Company Site shara kaw nbungli bawm wa jahkrat ai majaw, dai kaw ginsum sin na nga ai, Dainggai langai Asak si hkrum wa ai lam, ginra masha ni kaw na chye lu ai.
Tamahkan Mare hpe Myen Hpyen Jet Fighter Nbungli kaw na Pound 500 kaba ai Bawm mali wa jahkrat bun kau da ai lam ginra masha ni tsun ai re.
Ya ten Myen Hpyen dap gaw, Seng Tawng, Gwi Hka mare ni hpe gasat zing madu la lu na matu Hpakant Mashi Kahtawng Kyuhpyi bum hpe laja lana htim gasat taw nga ai re.
