Manmaw Deng 5 makau grup yin na Myen Hpyen Dap ni nga taw ai shara lahkawng hpe Mani gasat jasan kau lu ai lam, shawng lam hpyen magam gun ni tsun ai re.
Lai wa sai bat kaw na Myen Hpyen dap ni bai htim gasat wa ai hpe, Pawng hpawm dap maga na mung bai n htang htim gasat ai ten, gasat jasan kau wa lu ai lam re nga, shawng lam hpyen magam gun langai KNG Shiga de n dai zawn tsun dan wa ai re.
“Ndai laman gaw Deng 5 maga de gap hkat taw ai, dai makau grup yin na Myen Hpyen ni shamu wa ai majaw, gasat hkat wa ai re, dap shara gasat zing la lu ai ngu hta, jasan kau lu ai ngu tsun yang grau jaw na re, ya gaw gara maga na mung, lu da ai shara hpe bai makawp na matu n loi ai masa rai taw ai,” nga tsun dan wa ai re.
Ya htim gasat zing madu la lu ai shara gaw, Myitkyina Nmawk maga hku yu wa yang, Deng 5 mare Computer Dakkasu jawng makau grup yin shara ni hta laja lana gasat hkat taw ai mung rai nga ai.
Manmaw hpe n dai lanam rai n shang ai laman gaw, KIA dap maga shakre lu hkra shakut mat na masa nga ai lam, Hpyen masa yu maram ai ni tsun tawn ai re.
Ndai laman Manmaw majan shani shagu bai laja taw nga ai rai nna, ya bai gasat zing la lu ai shara ni gaw, lai sai ten, Pawng hpawm dap maga htingnut yen kau da ya ai shara ni re lam chye lu ai.
Manmaw shawng lam majan hta, Wunpawng Mungdan Shanglawt Hpyendap KIA hte Pawng hpawm dap ni rai nga ai, PDF hte laga bawsang laknak lang wuhpung hkum hkra lawm ai lam chye lu ai.
Manmaw Majan Ya dai ni ten du hkra rai yang, laning mi Shata 2 du wa nga sai re.
