Jinghpaw mung Majan laja lana byin nga ai Manmaw, Manje,Nmawk ginwang ni hta January Shata numdaw lahkawng lang galaw na hkyen da ai ra lata poi hpe, majan masa a majaw, n lu galaw sai lam, Myen hpyendap Ralata Poi Commision ndau wa ai re.
Nmawk, Manmaw, Maje Ginwang ni hta Ralata poi galaw na shara hku na Myen Hpyen dap masat da ai rai tim, Hpyen majan masa matut gasat hkat nga ding yang re majaw, n lu galaw sai lam ndau kau ai masa re nga mung masa yu maram ai ni n dai zawn tsun tawn ai re.
“ Myen Hpyen dap gaw, hpa mi nga nga, mungdan ting madang ra lata poi lu galaw ai ngu hpe shi n dau mayu ai, dai majaw, Ralata poi lu galaw na matu, Miwa Asuya ni Laiza de sa hkra sa bawngban jahkrup shangun ai, masan n sa ai majaw, n lu galaw sai lam n dau ai masa re nga,” Mung masa yu maram ai Salang langai KNG de tsun maram ai re.
Manmaw ginwang kata na mare kahtawng 43, Manje ginwang na mare kahtawng 43, Nmawk ginwang kata na mare kahtawng 65 the Shwegu ginwang kata na mare 39, Hpakant ginwang na mare kahtaw 8 ni hta ralata poi n lu galaw sai lam, Myen Hpyen Ra lata poi commission n dau jat wa ai re.
December 27 ya shana n dau wa ai lam hta, Mungdan ting madang Mung Shawa rapdaw 9, Amyusha rapdaw shara lahkawng the Mungdaw rapdaw shara 9 ni hta n lu galaw na re lam, bai kahtap masat ndau dat ai lam mung rai nga ai.
Ndai n dau ai hta, Jinghpaw mung kata na, Manmaw, Manje, Nmawk, Shwegu, Hpakant Ginwang kata na mare kahtawng ni law malawng lawm ai lam hpe mu lu ai re.
Dai majaw, Mungdan ting madang hta Myen Hpyen dap ra lata poi n lu galaw ai Ginwang 65 du hkra nga wa ai rai nna, mare kahtawng 4000 jan hta n lu galaw ai lam n dau da ai re.
Ra lata poi n lu galaw ai shara dai daram law hkra byin ai lam gaw, tara n shang masu hkalem ai ra lata poi re majaw nga, mung masa yu maram ai nit sun madi madun da ai re.
