Majan byin ai lam n nga tim, KIA Dung 44 shara de Myen Hpyen nbungli bawm wa jahkrat bun wa ai lam shawng lam hpyen magam gun hte ni nawn ni kaw na chye lu ai.
November 20 ya jahpawt jau hkying 7 aten daram hta, Myitkyina kaw na rawt lung wa ai Jet Nbungli langai KIA Dapba 9 n pu Dung 44 ginra shara kaw wa jahkrat bun kau da ai lam shawng lam hpyen magam gun hte ni nawn ai Salang langai KNG de tsun ai re.
“Mani Hpawt jau Kamaing Ginwang KIA Dung 44 kaw jet nbungli the bawm wa jahkrat bun kau dai ma ai, masha hkra hkala ai lam ni gaw hpa n nga ai, ngut na Lido lam maga de mung Myen ni hpyen n gun grai bai shamu taw nga ai,” nga tsun dan wa ai re.
Myen Hpyen Nbungli bawm wa jahkrat ai shara hta, Masha hkra hkala ai lam ni gaw, hpa n nga ai lam matut chye lu ai.
Dai jahpawt hta sha, Myitkyina de na yu wa ai Myen Hpyen Mawdaw kaba 3 Hpyen n-gun 150 ram lawm ai mawdaw 3 Danai maga de lai lung mat ai lam ginra masha ni tsun ai re.
Ndai laman hta Myen Hpyen hpung ni Danai lam de bai hpyen n gun jat bang taw nga ai majaw, dai ginra de hpyen masa bai shuk wa na hpe ginra masha ni myit tsang nga ma ai re.
Myen Hpyen dap daru magam zing kau ai hpang, Jinghpaw Mung shara shagu de majan byin wa ai rai tim, Danai lam de gaw dai ni du hkra majan kaba byin ai lam rai nnga shi ai re.
