Nangzaw Yang Lam kaw Sengke galau ai majaw, asak kaba sai Dinggai yan Dingla si hkrum
Waimaw Washawng, Nang Zaw Yang lam lapran kaw Mawdaw kaba langai hte Sengke adawt hkat ai majaw, Sengke jawn ai, Dinggai yan dingla asak si hkrum wa ai lam chye lu ai.
November 20 ya shani ka-ang hkying 11 aten daram hta Nang Zaw Yang Washawng lapran Mawdaw kaba hpe lai ai ten, lam manyen na mawdaw kata lai shang bang mat ai majaw, mawdaw rin apyet sat hkrum ai re lam, dai mabyin hpe chye ai ginra masha langai KNG shiga dap de tsun dan wa ai re.
“Asak kaba sai Dinggai yan dingla law, dingla wa gau ai rai nga ai, lam kaji ai le, lam kaji ai kaw she n dai laman marang loi li htu da rai lam manyen ai kaw she mawdaw kaba hpe lai ai nga yang, lam manyen na mawdaw kata shang mat ai kaw, Mawdaw kaba rin apyet sat kau ai ga rai nga ai,” nga tsun dan ai re.
Dai rin sat hkrum ai yan gaw, Asak 80 ning ram re ai Dinggai jan Nang Doi ngu ai wa hte Shi madu wa ngu maram lu ai Dingla wa rai nna, Mungchying masat kaw shaw yu yang, Myitkyina Zilun na re lam mu lu ai nga matut tsun dan ai re.
Mawdaw kaba gaw, Talaw gyi mare na Slg Teing Zaw ngu ai wa gau ai mawdaw kaba re lam chye lu ai.
Wunpawng Mungdan Shanglawt Hpyendap KIA the PDF pawng hpawm dap ni Waimaw Shwenyaung Pin hpyen dap hpe gasat zing kau ai hpang, Myitkyina Laiza mawdaw hpe dai Nangzaw Yang lam hku lai taw ai mung rai nga ai.
Dai lam gaw mung shawa ni yi sun sa lam hku na sha jai lang taw ai lam kaba langai rai tim, n dai hpang daw de gaw, langu htaw mawdaw kaba ni the Laiza sa ai mawdaw ni yawng dai lam hku na sha lai ra taw ai lam chye lu ai re.
