Myitkyina Putao Mawdaw lam kaba hpe Myen Hpyen dap ni hpaw dat ya ai n htoi 10 ya jan na wa ai hpang, Putao de lung na mawdaw kaba ni hpe bat mi hta lani mi sha lai shangun taw ai lam, ginra masha ni kaw na chye lu ai.
Putao Mawdaw lam kaba hpe Myen hpyen dap maga lai wa sai October 23 ya shani Hpyen masa lam hpe ninghpai nna, Putao Tayang Zup de lung ai mawdaw yawng hpe Lamung Zup mare kaw pat kau ya ai rai nga ai.
Dai hpang ndai November praw 7 the 9 ya shani bai hpaw dat ya ai rai tim, lani mi hta mawdaw kade sha mai lai na ngu ai shadawn jitna ni hte hkrai shalai ya taw ai lam Tayang Zup Mawdaw la langai KNG de n dai zawn tsun dan wa ai re.
“Ya lam pat da ai n htoi 10 ya jan na ai hpang, hpaw ya sai nga na lai lung wa ai, rai tim, ya bai pat sai nga, gara hku hpa re mung n chye,” nga tsun dan ai re.
October 23 ya shani pat kau ai hpang, October 27 ya shani kalang dai hpang, November praw 7 ya shani kalang praw 9 ya shani kalang hpaw ya wa ai rai nga ai.
Putao de na yu wa ai mawdaw ni hpe gaw, Mungla Shidi mahkrai hta hkap jahkring da nna, Myitkyina kaw na Putao de lung ai mawdaw ni hpe gaw, Lamung Zup hte Tanghpre mare ni hta hkap jahkring da ai mung rai nga ai.
Myen hpyen dap maga ya na zawn, hpawt dat pat dat lam ni galaw taw nga ai majaw, mawdaw la ni mayak hkrum taw nga ai re.
Bat mi hta lani mi lai shangun ai ten hta rai tim, Tsi mawan, Muga, N-gu ni n htaw shalai shangun ai lam chye lu ai.
