Myen Hpyen Jet Nbungli Lani Mi Laman KIA Shara 3 kaw Sa Gap bun
D-12 Ginra hpe Sa gap ai kaw Si Hkala law
Gumshem Myen Hpyen Nbungli ni n dai laman Jinghpaw Mung Shara shagu de hkan jahkrat bun taw ai lam mu lu nga ai re.
Mana Yuptung aten langai mi laman hta sha, Seng Tawng Maw Shan mare kaw langai wa jahkrat bun da ai hpang, KIA Dung 12 ginra de mung nbungli bawm bai sa jahkrat bun wa ai lam chye lu ai.
Dai hpang, Dai ni September 18 ya jahpawt Hkying 10 aten daram hta mung, KIA Dung 11 ginra de mung Nbungli bawm bai sa jahkrat bun wa ai re.
Shwegu Ginwang, Dung 12 ginra de sa jahkrat bun ai hta, KIA maga Si Hkala law wa ai lam Shawng lam magam gun the ni nawn ai ni KNG Shiga de n dai zawn tsun dan da ai re.
“ Mana Seng Tawng kaw wa gap ai hpang, Dung 12 de mung bai gap bun ai nga, Dai kaw gaw Si hkala tsawm ra law mat ai da. Wunkat galaw na hkyen taw ai shara kaw re da,” nga tsun dan ai re.
Nbungli bawm sa jahkrat bun ai shara gaw, Wunkat galaw na hkyen taw ai shara kaw wa hkrat ang ai majaw, Wunkat sharin hkam la na matu hkyen taw ai masha ni Si hkala law wa ai lam mung rai nga ai.
Ndai laman Dap Ba Dap Dung Shagu de, Ntsa hpyen sadi maja na lam the seng nna, Wunpawng Mungdan Shanglawt Hpung KIO Ginjaw kaw na mung, September 17 ya shani na n htoi hte sadi jaw matsun da ai re.
Lai sai ten Japan Hpyen Hpung ni Miwa Mungdan kata tawt lai shang gabye wa ai n htoi hpe masat la n htawm, September 18 ya shani Miwa Hkying (10:00 Am) ten hta jarit mayan n tsa hpyen makawp n’sen shangoi na re majaw, Myen Hpyen dap maga dai hpe ahkaw ahkang la nna, Hpyen hku dingbai daingna mai jaw wa ai lam hpe sadi maja na matu, nga nna tsun da ai hpe mu lu ai re.
