Hpakant Ginra kata, Majan masa lam a majaw, Hpaji jawng the Asuya rung ni yawng hpe pat da ai lam chye lu ai.
Ndai laman Hpakant ginra kata Myen Hpyen dap hte KIA PDF dap ni lapran hpyen masa shaja hkat nga ai sha n ga, shani shagu ngu na ram laknak kaba ni ngoi taw ai majaw, n dai laman jawng ni yawng hpe gan pat kau ai re lam Hpakant ginra masha langai KNG shiga dap de tsun dan wa ai re.
“Lahta Tsang, Lapran Tsang, Lawut sang jawng ni yawng pat da ai, bat mi nga na gaw tsun da ma ai, Ya madung gaw, Hpakant Muklum kata kaw re ga rai nga ai, Lawng Hkang, Maw Si Za mare ni hkan gaw, moi ya hkan na gap hkat taw ai rai tim, Hpakant Myo kata kaw nan gaw, n dai laman grau na shaja hkat wa ai masa re ga rai nga ai,” nga tsun dan ai re.
Myen Hpyen dap ni n dai laman Hpakant Seng Tawng Yuma maga de hpyen shamu shamawt ai lam ni galaw taw nga ai majaw, shani shagu laknak kaba ni the gap bun hkat taw nga ai re.
Mana mung Hpakant Mashi Kahtawng ရေအေးဂျောင် Malang Dung Ninghtawn maga de laja lana gap gasat hkat wa ai re.
Hpakant ginra kata Hpyen masa kahtet nga ai sha n ga, Myen Hpyen dap maga na mara kata mung shawa ni hpe mung jahkring hkring hkan rim woi taw nga ai re.
Ndai laman Myen Hpyen dap ni rim woi hkrum ai mung shawa marai 40 hkawt daram du sai lam, Hpakant masa lam hpe chye lu ginra masha Langai gaw ndai zawn matut tsun ai re.
“Myen Hpyen dap maga na gaw mu ai ni hpe rim la taw nga ai, Gara kaw na gadai ngu ai hpe a tsawm tup hkrak n sagawn sai, yu na n tsen n hten na zawn re hte gaw rim taw nga ai, dai masa du taw nga ai, ndai laman Myen ni grai bai shamu wa ai majaw, majan mung grau na bai laja wa na masa nga ai ga rai nga ai,” nga na tsun ai.
Hpakant ginra kata na Hpaji jawng 100 daram yawng hpe pat da ai mung rai nga ai.
Myen Hpyen dap daru magam rai n zing shi ai ten, Covid ana a majaw, Ma ni a hpaji jawng lung ai lam hpang hkrat mat nna, ya n dai kalang mung Hpyen masa a majaw, ma ni jawng lung daw daw mat na hpe Jawng ma kanu kawa ni myit tsang taw nga ai re.
