Wunpawng Mungdan Shanglawt Asuya Sinna Ginwang Ginjaw, KIA masat Dapba 2 ginra de Myen Hpyen dap ni Y12 nbungli hte bawm 20 lang daram wa jahkrat bun kau da ai nga dai ginra na Magam gun ni KNG de tsun shateng wa ai re.
Mana de hkying 7 Minute 15 ten daram hta, Mandalay de na rawt lung wa ai Nbungli 2 hte bawm 20, 30 lang ram wa jahkrat bun kau da ai nga, Dapba 2 kata na amyu shayi magam gun langai KNG shiga dap de tsun shateng wa ai re.
“Um re ai, mana hkying 7 loi jan kaw wa jahkrat bun kau da ai, 10 jan, 20 dang gaw she n rai na i? rai tim anhte maga na gaw hpa n ra ai, Dap kata na dum n ta ni loi hkra hten mat ai sha re. Nbungli nsen ngoi wa ai hte yawng lu makoi mat ai majaw, hpa n ra ai ga rai nga ai,” nga tsun ai.
Ndai laman hta Dapba 2 ginra kata Myen Hpyen dap Pyithutsit ni the KIA lapran gap gasat hkat ai lam ni hpe n nga ai re hpe sagawn chye lu ai re.
Myen Hpyen Dap Y12 Nbungli hte KIA Masat 2 Dapba daju de nbungli bawm wa jahkrat ai lam gaw teng ai nga, Dukaba Nhpang Naw Bu mung KNG Shiga dap de tsun shateng wa ai re.
“Mana Hkying 7 aten daram hta e, Masat 2 KIA Dapba Daju Dingsa hta e Myen ni Y12 nbungli hte bawm 10 lang ram wa jahkrat bun kau da ai lam na lu ai, dapba daju ding sa she re majaw gaw, masha si hkala ai lam gaw n nga na re,” nga nna tsun dan wa ai.
Mana de Myen Hpyen dap ni nbungli bawm wa jahkrat bun ai shara gaw, KIA masat 2 dapba daju ding sa Awng Lawt kaw rai nna, masha si hkala ai lam ni gaw hpa n nga ai lam chye lu ai.
Ya na zawn, Sinna Ginwang ginjaw Dapba 2 de n bungli bawm wa jahkrat ai gaw, Min Zay Thant Pyithutsit wa, shara madun na wa jahkrat bun shangun ai masa mai byin ai lam, Mung masa yu maram ai ni tsun tawn ai re.
Myen Hpyen dap ni ndai lamang Jinghpaw mung de madung sha-ang na Nbungli hte htim gasat wa mai ai majaw, KIA Dapba ni rai nga ai, Dapba 2, Dapba 9, Dapba 5, Dapba 7, ginra ni de grau nna, Nbungli maja ra na masa nga ai lam, Hpyen masa yu maram ai ni tsun shadum da ai re.
