Hkahku Uma ga de dai ning bai Yuli hku a majaw, Hkai Nmai ni bai jahten hkrum taw sai lam, ginra masha ni KNG shiga dap de tsun dan wa ai re.
Hkahku Uma ga de lai wa sai shaning hta mung, Yuli hku hkrum sha wa ai rai nna, Maning ten laman hta gaw, Mawdaw lam kaba mayan sha grau laja ai rai tim, dai ning gaw, Hkahku Uma ga ting hta Yuli hku sawng taw ai lam ginra masha langai KNG shiga dap de tsun dan wa ai re.
“Yulihku gaw, Maning Sumprabum Mawdaw lam mayan de byin law ai, dai ning rai yang gaw, n dai mali hka sin praw maga, Mali Nmai Wa Lawng, Mali Hkrang wa lawng yawng kaw byin taw sai,” nga nna tsun dan wa ai re.
Yu ni gaw, Mam yi jahten ai sha n ga, laga hkai nmai yawng hpe mung jahten ai, dai majaw gaw, dai ginra ni hta malu masha grai yak hkak wa na masa nga ai lam, ginra masha ni tsun ai re.
HKahku Uma ga hta gaw, Bum Yi hpe sha madung galaw sha ai ginra rai nna, n dai ten, hkai n mai loi li pru wa ai ten, Yu ni yawng jahten kau ma ya ai majaw, Yi simai hpa mung n lu la ai lam chye lu ai.
Dai ning laman hta Yu ni shawoi na hta grau ladu lai zingri taw ai majaw, Hkai n mai hpa mung lu la na n tai ai lam tsun ai re.
Ya na zawn, Yu ni Hkai n mai jahten taw ai lam the seng nna, Machyoi hpaji chye ai ni nga yang mung, Hpaji jaw la na hpe ginra masha ni hpyi shawn nga ai re.
