Waimaw De Myen Hpyen Dap ni Hpyen N’gun kaba sha n ga, Hprigang mawdaw ni hte htim gasat nga.
Waimaw ginra maga de Myen Hpyen dap ni n dai laman Hpyen n gun kaba the bai htu shadut htim gasat wa ai zawn, Myitkyina hkran maga de na laknak kaba ni the mung bai gap sharu bun taw nga ai lam, shawng lam hpyen magam gun hte ni nawn ai ni tsun ai re.
Myen Hpyen dap ni n dai laman Waimaw Lamyang mare de lagaw dap hku n lu htim gasat hkraw ai majaw, Hprigang mawdaw ni lang nna, htim gasat nga ai sha n ga, Nbungli bawm ni the mung ding yang wa jahkrat bun ya taw nga ai re.
Majan byin ai shara de, Myitkyina Myen Hpyen dap daju M.P.Hk kaw na mung laknak kaba ni gap shapyen bun taw ai majaw, Myitkyina ginra masha ni, shana n lu yup hkrit kajawng ai lam ni byin hkrum hkra taw nga ai lam, ginra masha langai KNG shiga dap de tsun dan wa ai re.
“Mana tup sinat kaba n’sen ngoi ai, she gadu ai, n ta ni she gara ai, nau hkrit na gara de mung n chye hprawng, dai hku she mai byin ai hku nga shalai taw ai,” nga na tsun dan wa ai re.
Myen Hpyen Dap Nbungli bawm a majaw, Mukchyik Buga Hkalup Hpung Nawku Jawng nnan mung yawng hten malawng mat sai lam chye lu ai.
Waimaw Ginwang kata shara law malawng hpe, KIA hte Pawng hpawm dap maga, lai wa sai shaning hta htim gasat zing madu kau ma ai hpang, Wuyan Pyithutsit dap shara hte Waimaw 58 Myen Hpyen dap shara ni sha ngam mat ai re.
Ya ten Myen Hpyen dap ni gaw shan the tat sum da ai shara ni hpe bai gasat zing madu la lu na matu laknak hpyen n gun kaba hte htu shadut htim gasat taw nga ai n htoi bat mi ram du wan ga sai re.
Myen HPyen dap maga ya na zawn, Waimaw ginra de Majan man bai hpaw wa ai gaw, Manmaw majan hta sum machyi lam ni law wa ai majaw, Hpyen lagaw gang ai hku na, dai ginra de majan bai baw wa ai mung mai byin ai lam, hpyen masa yu maram ai ni tsun da ai re.
