Hopin hte Monyin Lapran na Mare Kahtawng Nkau Hpe KPDF hprawng Yen na matu tsun sadi jaw
Monyin the Hopin mare lapran na Nan Sawlaw mare masha ni hpe n dai laman lawan htawt sit hprawng yen na matu, KPDF dap maga na tsun sadi jaw wa ai majaw, Majan byin ai lam n nga tim, ginra masha n kau htawt sit hprawng yen taw sai lam chye lu ai.
Ndai laman Monyin Hopin maga de majan gap gasat hkat ai lam n nga ai rai tim, Indawgyi maga de majan byin taw ai majaw, Hpyen Garum sa ai KPDF ni dai mare lam ni hku na lai dan taw nga ai nga, Ginra masha langai KNG de n dai zawn tsun dan wa ai re.
“Ya majan byin nga ai gaw, Indawgyi maga de rai nga ai, PDF hking the n dai laman grai yan dan ma ai, n dai de mung gara hku rai wa kun, majan byin na hpe gaw gadai mung n ra sharawng ai le. Nbyin yang gaw grau mai kaja ai rai nga ai, rai tim, n kau mung shawa ni gaw, KPDF dap ni yen mu nga majaw yen ai ni mung gaw nga sai,” nga na tsun ai re.
Hopin hte Monyin lapran na Nan Sawlaw mare hpe n dai laman masa n htuk ai majaw, tau hkrau lawan hprawng yen na matu Mare salang ni hpe KPDF dap maga na lit nga ai ni tsun sadi jaw wa ai re lam chye lu ai.
Indawgyi ginra de, Sam Hkyeng SNA hte Pyithutsit pawng hpawm dap ni hpe KIA KPDF dap ni htim gasat taw nga ai rai nna, n dai laman dai ginra de nga ai Pyithutsit dap shara ni yawng hpe htim gasat na lam shiga pru wa ai hpang, ya na zawn tsun sadi jaw wa ai masa re lam ginra masha ni tsun maram da ai re.
Ndai laman dai ginra hta majan byin ai lam ni gaw n nga tim, lahkawng maga na hpyen shamu shamawt ai lam ni ding yang nga taw ai hpe mu lu taw ai lam ginra masha ni tsun ai re.
Ya Ya na zawn lahkawng maga dap na ni hpeyn shamu shamawt taw ai majaw, majan laja wa na masa nga ai lam ginra masha ni tsun maram nga ma ai re.
Majan laja wa na masa nga ai rai tim, Hopin Monyin n dai de byin na kun? Indawgyi maga de sha byin na kun hpe gaw tup hkrak n chye lu ai nga na matut tsun ai re.
Ya ten dai ginra na mung mare masha n kau, Nan Tar Yar, Namma, Hopin mare ni de nkau htawt sit hprawng yen taw nga sai re.
