Nam De na Hprawng yen pru wa ai Hpyen Yen mung Shawa ni a matu hkyak hkyak Garum ningtum ra gadawn taw nga

Ndai laman Nam de na hprawng yen pru wa ai Hpyen yen mung shawa ni a matu ra ahkyak garum ningtum ra taw nga ai lam, lit nga ai ni tsun ai re.

Lai wa sai April Shata kaw na nam de hprawng yen hkawm taw nga ai, Ma U Pin, Ye Ka Ta Mare hkan na Hpyen yen mung shawa ni gaw, nam de Shata lahkawng jan hprawng yen ai hpang, lam shagu hta mayak law wa ai majaw, Htingnai ginwang kata de bai hprawng yen pru wa ai lam re nga, Hpyen yen ni hpe yu lakawn taw nga ai, magam gun langai KNG shiga dap de tsun dan wa ai re.

“Ye Ka Ta, Ma U Pin mare na ni gaw, nam de Shata lahkawng jan ram hprawng ai, nam kata kaw mung bat mi hta ginsum lahkawng lang lang ram galaw na hprawng yen ai, ya marang htu machyi makaw lam ni law wa ai majaw, anhte ginwang kaw hprawng shingbyi na matu garum hpyi wa ai majaw, lai wa sai 16 ya shani kaw na Htingnai Ginwang lamu ga, hta shara jahkrat da ya sai,” nga tsun dan wa ai re.

Dai Hpyen yen mung shawa ni gaw, Myen Hpyen dap the Pyithutsit na Hpakant lam de htu gasat lung wa ai ten, hprawng yen mat ai Mung mare masha ni rai nna, Nam Kata Shata lahkawng jan hprawng yen ai hpang, ya na zawn, Myo mare kaba de bai htawt sit hprawng yen pru wa ai mung rai nga ai.

Ya hkyak hkyak majan byin taw nga ai, Indawgyi ginra de na Hpyen yen mung shawa n kau mung Htingnai Ginwang kata de hprawng yen du wa ai majaw, dai ni a matu mung ra ahkyak malu masha hte ginsum n ta ni ra taw ai lam matut tsun ai re.

Lai wa sai July 14 ya shani kaw na Mai Nawng Mare de Majan byin wa ai majaw, dai mare na mung shawa ni ginra masum garan nna, hprawng yen pru wa ai hta, Chaung Wa hte Loi Mun maga de hprawng yen ai mung shawa n kau, Mogaung de nam lam hku na hprawng yen pru  wa ai lam chye lu ai.

Ya ten dai hpyen yen mung shawa ni hpe yu gawn na matu ra ahkyak taw nga ai masa lam the seng nna, lahta na magam gun wa n dai zawn matut tsun dan wa ai re.

“Hkyak hkyak du wa ai re nga jang gaw, du hkra ladaw n bung ai majaw gaw Hkali ni mai byin wa ai, ya lanam ta re majaw gaw, hkyak hkyak Sut ra gadawn taw ai ga rai nga ai, Kashung ta n du shi ai majaw gaw Nba dai ram n ahkyak shi ai, ya ahkyak ai gaw sut rai nga ai, ngut na malu masha hte rawng na matu Ginsum rai nga ai, Ginsum gap na matu lanam ta tim, kawa shaw taw sai, ya gaw gap na shara ni ma yu da sai, madung gaw Emergency arung arai ra ai ga rai nga ai,” nga tsun dan wa ai re.

Mai Nawng mare hta lai wa sai July 14 ya shani Sam Hkyeng SNA dap ni Má ja htim gasat shang wa ai majaw, ginra masha ni Jahpaw jau hkying 4 daram aten dumbri dumbra hprawng yen pru wa ai rai nga ai.

Mai Nawng ginra masha ni ginra masum garan na hprawng yen ai hta, 1. Tamahkan, 2. Loi Mun maga, 3. Chaung Wa maga ni de hprawng yen ai re.

Dai zawn Nam de hprawng yen ai kaw na, Lanam ta aten, marang htu machyi makaw law ai majaw, Nam lam hku na Pin Baw mare de gale pru wa ai rai nga ai.

Ya ten dai hpyen yen mung shawa ni hpe Mogaung Sinna Buga nawku jawng wang hta shara jahkrat da ai rai nna, dai ni a matu malu masha hte Dinghku lang arung arai ni ra gadawn taw nga ai re.

Htingnai Ginwang kata ya ten Hpyen Yen mung shawa marai 3000 hkawt nga ai rai nna, dai hpyen yen mung shawa ni hpe, KBC – HDD hte Ginwang HDD ni lata gindun nna, mai byin ai hku na garum jaw taw nga ai lam chye lu ai.