Jinghpaw Mung De Ameracan Datkasa rung magam gun Susan Stevenson Ginra masha ni the wa du hkrum shaga
Ga Sau n hprang pru ai Jinghpaw Mung de, Ameracan Asuya maga myit shang sha ai lam, shiga ni pru wa ai hpang, Yangon Ameracan Sumtsan Datkasa rung na magam gun Susan Stevenson jinghpaw mung de lung nna, Hpaga hpung hte Jinghpaw Mung Myitsu Du salang ni the wa hkrum jahta wa ai lam chye lu ai.
Yangon Ameracan Sumtsan hkringmang rung magam gun Susan Stevenson gaw, lai wa sai bat, August 11 ya shani kaw na 13 ya shani du hkra, Jinghpaw Mung Myitkyina Muklum kaba kaw, Jinghpaw Mung Sut Hpaga hpung ni, Myitsu Du gyi Salang ni the wa hkrum jahta wa ai lam, Ameracan Sumtsan Datkasa rung na tsun da ai re.
Jinghpaw Mung Ginra masa lam, Sut hpaga lam ni hte seng nna, Ameracan Sumtsan datkasa rung na, magam gun ni mu chye mayu ai ni hpe ginra masha ni the nan wa du hkrum shaga ai lam re nga nna, matut tsun da ai hpe mu lu ai.
“Madung gaw Ginra masha ni the wa hkrum shaga ai ga rai nga ai, Miwa kaw shamyet shanat ai lam hpe mai byin dang di a daram shayawm mat wa na matu,” nga nna, tsun da ai re.
Jinghpaw Mung kaw pru ai Sut Nhprang ni hpe Ameracan Asuya kaw na myit shang sha wa ai majaw, ya na zawn, wa du gawan hkawm ai masa re lam ginra masha ni tsun maram nga ma ai re.
Ameracan gaw Jinghpaw Mung, Miwa gumsan mungdan hpe shamyet shanat taw ra ai sut hpaga lam masa hpe galai shai wa na matu galaw shakut wa ai masa re lam matut tsun maram da ai re.
Jinghpaw mung hta Myen Hpyen Dap daru magam zing kau ai hpang, Myen Hpyen Dap hpe rawt malan htim shagrawt taw nga ai aten re majaw, Jinghpaw mung hta majan laja lana byin taw nga ai ten mung rai nga ai re.
Myen Hpyen dap daru magam zing kau ai hpang, Jinghpaw mung a Sinpraw Dingdung ginra ga sau pru dik ginra yawng ngu na ram hpe KIA htim gasat zing madu kau ai hpang, dai ginra hpe ya ten, KIO Uphkang Sairu hte uphkang taw nga ai re.
