Kamaing Namya mare ni hta dap jahkat na matu Myen Hpyen Dap the Pyithutsit ni n dai laman Hpyen n-gun kaba hte bai htu nga ai majaw, ndai laman shani shagu majan bai byin taw nga ai nga, KIA the ni nawn ai ni tsun ai re.
Hpakant lam hpe Myen hpyen dap ni bai hpaw dat ya ai hpang, Kamaing, Mogaung maga de na Hpyen n-gun 500 daram lawm ai hpyen hpung ni bai lung wa ai gaw, Nam Ya rai n du shi yang na Lagat Kawng mare hta du shatup taw sai lam ginra masha ni kaw na chye lu ai.
Ndai laman Hpakant de Myen hpyen n gun htu taw nga ai lam the seng nna ginra masha langai tsun dan ai gaw,
“Ya bai lung wa ai hpyen hpung ni hpe maram yu yang, lam lahkawng hku na maram lu ai. Hpakant de matut lai lung mat na kun? Shing nrai Namya Senghpra Kap Maw mare ni hta dap shara jahkrat na matu lung wa ai kun? Ya na masa gaw lahkawng yan mai byin ai. Hpa majaw nga yang Hpakant lam yawng hpe moi na zawn sha Myen ni bai up madu da lu na matu gaw, dai mare hkan dap shara jahkrat ra ai le. Ya lung wa taw nga ai Hpyen hpung ni gaw, Namya hte deng mi ram sha tsan ai Lagat kawng mare kaw du nga sai,” nga nna tsun dan wa ai re.
Lagat Kawng KIA ni shagyit jahkrat ai shara kaw Myen Hpyen hpung ni wa du nga nna, Nam Ya de matut lai lung wa na matu shakut nga ai majaw, Um Kahtawng mare makau grup yin hta n dai laman shani shagu gap gasat hkat taw nga ai re.
Lagat Kawng, Um Kahtawng mare ni hta n dai laman shani shagu bai gap gasat hkat taw nga ai majaw, Hpakant na yu wa lung wa mawdaw ni hpe hpaw dat pat dat lam ni galaw taw nga ai hpe mu lu ai re.
Dai Myen Hpyen hpung ni Hpakant de matut lai lung mat ai rai yang, Hpakant ginra kaw n dai hta grau nna, Majan laja wa mai ai lam ginra masha langai mung n dai zawn matut tsun maram da ai re.
“Re ai,Kamaing lam hku na Min Zay Thant Pyithutsit hpyen n gun 100 daram the Mogaung Ts K Hk na Myen Hpyen La marai 300 ram bai lung wa taw nga ai nga na ai. Lung wa ai n htoi 3 ya rai sai. Dai majaw Hpakant lam n dai laman shani shagu bai gap hkat taw nga ai,” nga nna, tsun dan wa ai re.
Hpakant lam de Myen Hpyen hpung ni kalang lung wa yang hpyen n-gun yawm dik 300 ram lawm ai hpe chye lu ai.
Hpakant lam hpe KIA htim gasat zing madu kau ai hpang, Hpakant lam mayan de Myen hpyen dap hpyen n gun kaba hte htu lung wa ai, ndai kalang hte rai yang, masum lang rai sai lam matut chye lu ai.
April Shata Shawng ningnan lung wa ai Hpyen hpung ni gaw, Hpakant de June Shata praw kaw du shang mat wa ai hpang, Lung Seng Company wang ni hpe wan hkan nat jahten hkawm wa nna, n dai laman KIA ni nga ai maga de bai htu gasat nga ai majaw, majan shani shagu byin nga ai re.
Dai zawn sha July Shata praw kaw htu lung wa ai Myen HPyen hpung ni hte mung Sut Bum, Kate, Mawwan, Sharaw hka mare ni hta majan ding yang gasat hkat nga ai re.
Shawng na numdaw lahkawng lung wa ai hpyen hpung ni gaw, ya ten Hpakant ginra na shan hte tat sum da ai shara ni hpe bai lu na matu, hkan htim gasat hkawm taw nga ai re.
Ya ten Hpakant lam mayan Ma U Pin hte Nam Ting mare lapran hpe KIA dap maga matut up da ai rai nna, Ma U Pin lawu Lawa Kamaing shara ni hta Myen Hpyen dap the Pyithutsit ni dap jung shara jahkrat nna, Nam Ting hte Lawng Hkang mare lapran hpe mung Myen ni up da ai lam chye lu ai.
Ndai laman Myen ni Hpyen shamu taw nga ai majaw, Hpakant de hkawm sa na mung chying mung shawa yawng hkawm sa hkawm wa lam ni naw sadi maja na lam, ginra masha ni tsun sadi jaw da ai re.
