Manmaw Myawk Dap 366 hpe Myen ni Bai Gasat zing la lu sai lam, Myen HPyen Dap tsun
Myen Hpyen Hka Sanghpawli Manmaw du ai hpang, Myen Hpyen dap maga na htim gasat majan bai hpaw wa ai majaw, shani shagu majan laja lana gap gasat hkat taw nga ai re.
Myen Hpyen Hka Sanghpawli hpung ni lai wa sai August praw 2 ya shani Manmaw de du shang ngut ai hpang, Myen Hpyen dap maga na htim gasat majan bai hpaw wa ai majaw, shani shagu majan laja lana gap gasat hkat taw nga ai lam shawng lam hpyen magam gun ni KNG shiga dap de tsun dan wa ai re.
“Ndai laman Myen Hpyen Sanghpaw kaw na laknak machyu pala alaw alam bai htaw sa da ai majaw, Drone the shani shana gap jahkrat bun hkawm nga ai, Majan gaw laja nga ding yang re, laknak kaba shani shana gap shapyen bun hkat taw ai ga rai nga ai,” nga tsun dan wa ai re.
Ndai laman majan laja lana gap gasat hkat nga ai hta, Pawng hpawm dap ni gasat zing madu da ai Manmaw Myawk dap အမတ ၃၆၆ dap shara hpe Myen ni bai gasat zing la lu sai nga Myen Hpyen Telegram Shiga ni hta Vedio Sumla the rai na tsun da ai re.
KIA hte Pawng hpawm dap maga na mung Manmaw Hpyen man kaw na htawt sit yen ai lam hpa n nga ai sha matut shakut nga ding yang re lam shawng lam hpyen magam gun ni matut tsun dan wa ai re.
Myen Hpyen Hka Sanghpawli hpung ni lung wa ai ten, Nbungli the Hka Sanghpawli n tsa kaw na Hka Kau mare ni de Laknak kaba ding yang hkan jahkrat bun wa ai majaw, mung Shawa marai 32 asak si hkrum wa sai re.
Mung Shawa marai 32 si hkrum wa ai hta, Wet Let Ginwang kata na mung shawa 21 Katha ginwang na marai 2, Shwegu ginwang na mrai 7 re lam chye lu ai.
Manmaw hpe lai wa sai 2024 December praw 4 ya jahpawt kaw na htim gasat hpang wa ai gaw, Manmaw muklum htim shagrawt majan masing ya Shata 8 jan na wa sai re.
Manmaw muklum hpe htim gasat shagrawt nga ai hta, Lawu ga de na PDF hpyen magam gun law law mung gasat shang lawm nga ai zawn, Rahkaing, Hkang, Jawngma Dap the laga Rawt malan Jinghku wuhpung law law mung shang gasat lawm nga ai hpe mu lu ai re.
