Waimaw Wuyan, Lamyang Mare ni hta dai ni shani ka ang hkying 12 ram kaw na gap gasat hkat hpang wa ai gaw, dai na maga de du hkra laja lana gap gasat hkat taw nga ai lam Waimaw Ginra masha langai KNG shiga dap de tsun dan wa ai re.
Dai ni shani ka-ang hkying 12 ram kaw na Wuyan Lamyang mare maga de shawng gap gasat hkat wa ai hpang, dai na maga de kaw na, Mai Na kaw na Wa Shawng lung wa lam lapran hta laja lana gap gasat hkat taw nga ai lam, ndai zawn tsun dan wa ai re.
“Ya gaw anhte makau kaw nan ja ji nut hkat taw nga sai, dai hpawt manap hkying 12 ram kaw na Wuyan Lamyang dai hku gap hkat wa nna, ya gaw Mai Na hte Washawng lapran na မြို့ရှောင်လမ်း shara Tinggi Hka mahkrai lai kaw e Lisu ni gate dung ai Solar ပြား site nga nga ai, dai shara hkan gap gasat hkat taw nga ai, Marang mung htu dik ai agying nut hkat nga ma ai.” Nga tsun dan wa ai re.
Dai ni kaw na Maina hte Washawng lam lapran gap gasat hkat nga ai majaw, hkawm sa hkawm wa Mawdaw ni yawng gadai hpe mung n lai shangun ai sha, lam pat da ai masa re nga, ginra masha ni matut tsun dan wa ai re.
Ya gap gasat hkat taw ai shara gaw, Maina Hpyen yen dabang kaba hte nau n tsan ai shara re majaw, Hpyen yen mung shawa ni hkrit tsang taw nga ai re.
Tinggi Hka makau grup yin kaw gap gasat hkat nga ai hta, မှန်ပြတောင် hte ဝိုင်းမော် (ခလရ ၅၈) Myen hpyen dap shara ni kaw na laknak kaba gap bun ya taw nga ai lam matut chye lu ai.
“Ya majan byin nga ai maga de LaPai LaHkra yawng de na laknak kaba gap bun bang taw ai ga rai nga ai, မှန်ပြတောင် kaw na mung gap ဝိုင်းမော် 58 Myen hpyen dap kaw na mung gap, Dai Solar ပြားဆိုဒ် kaw shadun da ai laknak kaba ni grai hkyen nga ma ai” nga matut tsun dan wa ai re.
Mung Na – Washawng lam maga de Myen hpyen hpung kaba the lai wa sai May 26 ya shana lai shang bang mat wa ai rai nga ai.
Dai lam kaba gaw, KIA the Pawng hpawm dap ni Waimaw de htim gasat shang wa ai hpang, shawoi lai taw nga ai Waimaw Lamyang Washawng gat dara lam kaba hpe Myen ni pat kau ai majaw, Mung shawa yawng gaw, ndai Mung Na – Washawng langu htaw mawdaw lai ai lam kaba hku na, lai sa lai wa galaw taw ai mung rai nga ai.
