Myitkyina muklum kata hta ya ten MPT Sim Card langai Mun 3 jaw na mari lang ra taw ai lam, ginra masha ni tsun ai re.
2024 ning July shata kaw na Jinghpaw mung ting madang hta Phone Internet line yawng pat mat ai hpang, Myitkyina muklum shara n kau hta MPT Phone line hpan mi sha shaga mai mat ai re.
“Phone line yawng pat mat, MPT hpan langai sha mai ai re nga yang gaw, gade hpu tim dai hpan langai hpe sha mari lang taw ra ai ga rai nga ai,” nga Myitkyina ginra masha langai KNG de tsun dan ai re.
Phone Internet line yawng pat kau ai ten Myitkyina Myo kata MPT rung makau hte Uphkang rung makau grup yin ni hta sha Phone line lu ai rai tim lai wa sai August shata kaw na lawk shara n kau hkan Phone line bai lu ai hpang wa ai rai nga ai.
Ya na zawn MPT Phone line loi li lu wa ai hpang, Phone sim Card ni manu laja wa ai re lam ginra masha ni tsun ai.
Line n nan n kaja wa ai ten Sim Card langai hkying 8 ram sha nga ai rai tim, Ya 35000 du mat sai rai nga ai.
MPT Phone Sim Card ya na zawn manu tsaw rawt wa ai lam gaw, hkrun lam a tsawm n hkrang, lam lapran na mayak lam ni a majaw re nga ginra masha n kau tsun ai re.
Myen hpyen dap daru magam zing kau ai hpang, Phone Internet line ni hpe jahkring hkring pat kau ya na bai hpaw ya ai rai tim, n dai kalang pat kau ai gaw, ya du hkra n hpaw ya ai re.
