Kokang Dap Maga Gap Shadam Ai Laknak Kaba Si A Majaw Mung Shawa Matut Si Hkala
Kokang MNDAA dap maga na gap dat ai laknak kaba mung shawa dum nta wa hkrat ang ai majaw, dai hpawt manap marai 3 si nna, marai 13 bai hkala hkrum wa sai re.
Dai hpawt manap hkying 6 daram ten hta, Kokang dap maga na gap dat ai Short Taik Done laknak kaba Lashio Daw ( 9 ) Wanleng daru makau hta wa hkrat ai majaw, dai kaw nga ai Ma kaji langai hte amyu shayi 2 asak si hkrum wa nna, marai 13 hkala hkrum wa ai nga, dai ginra na garum ningtum hpung ni tsun ai re.
“Dai hpawt mana Lashio Buda Tipaw maga na shang wa ai lam, dai kaw 2 wa hkrat ai marai 3 si nna, marai 13 hkala hkrum wa ai, dai hpawt sha byin mat wa ai, dai hpawt si ai hta asak 20 ning ram re amyu shayi nga yang hkungran da ai pyi rai n na shi ai.” nga tsun ai.
Daihpawt manap Kokang dap maga gap ai laknak kaba wa hkrat ai shara ni gaw, ထင်းရှုးမြိုင် makau hta 1, Nay Chi Jawng makau hta 1, Wanleng daru makau hta lahkawng, တောရ hpungkyi jawng makau hta 3 hkrat kapaw wa ai re.
Dai hpawt si hkrum ai hta asak 13 ning re ai la kasha langai, hkungran da ai gade nna shi ai asak 20 ning re ramma amyu shayi langai hte asak 50 daram re ai hpawmi langai re lam chye lu ai.
Lashio mare kaba makau grup yin hta July praw 2 ya shana kaw na majan gap gasat hpang wa ai gaw, rawt malan hpung maga na Myen hpyen dap nga ai maga de laknak kaba gap bun ai hta mung shawa dum nta wa hkrat ang ai majaw, ya na zawn si hkala law taw ai rai nga ai.
Ya ten du hkra lahkawng maga man pa gap gasat hkat ai lam ni rai n nga shi ai rai tim, lahkawng maga laknak kaba ni hte ding yang gap shadam bun hkat taw nga ai mung rai nga ai.
Ya na zawn lahkawng maga laknak kaba gap shadam bun ai hta, mung shawa si hkala law wa majaw, dai mare na mung shawa tsa htam shadang 70 ram gaw mare kata na hprawng yen ma sai re.
Mung shawa mun lam hprawng yen taw nga ai majaw Lashio kaw na pru wa ai mawdaw lam kaba yawng chyat taw nga nna, lam lapran hta yak hkak hkrum ai mung shawa law law rai nga ai re.
Sammung ginra hta Myen hpyen dap shara ni hpe dingdung daw rawt malan pawng hpawm dap ni maga lai wa sai July 25 ya jahpawt kaw na htim gasat hpang wa ai gaw ya ten majan laja lana matut gap gasat hkat taw nga ai re.
