Hpakant Lunghkang ninghtawn, San Hka hte Mazup yang mare lapran na hka lawng kaba lahkawng hta tsang ra shadang lai hkra hka hpring taw nga nna, dai hkalawng kaba lahkawng baw wa na masa nga ai majaw, lamu ga nyem ai shara de na Seng Ra, Mazup Yang, Lunghkang mare hkan na mung shawa ni myit tsang taw nga ai re.
Lai wa sai June 30 ya shani kaw na marang kaba n hkring n sa htu wa ai majaw, Lunghkang mare na တစ်သုံးလုံး hte တောက်ပကြယ် Lungseng htu company a nhkun dingsa hka lawng kaba lahkawng hpring gabrat taw nga nna, baw ru wa ai rai yang, Lunghkang, Seng Ra mare ni hta hka yawng lim mat na re majaw, ginra masha ni myit tsang taw nga ai lam n dai zawn tsun dan wa ai re.
“Ndai laman marang ndai hku sha htu kaba taw yang gaw, baw ru wa na masa nga ai, lama baw ru wa ai rai yang ndai Sanghka, Mazup Yang, Lunghkang, Kate mare ni de gaw hka yawng lim mat na re, dai majaw mung shawa ni gaw kaning n chye di myit tsang na nga taw ai ga rai nga ai.” nga tsun ai.
Ya ten Hpakant hta marang matut htu taw nga nna, dai hka lawng lahkawng hta hka hpring gabrat taw nga ai majaw, hkalawng gyi ru wa na masa rai taw ai nga ginra masha ni matut tsun ai re.
Dai hkalawng lahkawng hta တစ်သုံးလုံး company a lungseng nhkun hka lawng gaw, deng 5 grup yin daram kaba nna, sung de pe hkying mi daram nga nna, 8 ning daram htu shaw sha sai shara re lam chye lu ai.
dai zawn တောက်ပကြယ် company na hka lawng mung တစ်သုံးလုံး company na daram nga ai lam matut chye lu ai.
Lama dai hka lawng lahkawng gyi ru wa ai rai yang, Lunghkang mare ting hka hpring mat nna, mung shawa yawng jam jau hkrum mat na re lam ginra masha langai ndai zawn matut tsun dan wa ai re.
“Marang shani shagu matut htu taw nga ai majaw, dai hka lawng lahkawng n gyi ru wa hkra gaw galaw nga ma ai, rai tim gade daram lu galaw na ngu gaw n chye ai, lama gyi ru wa yang gaw grai hkrit tsang hpa re,” nga matut tsun ai.
Lai wa sai bat hta, Uru hka kaba wa ai majaw, dai ginra na mahkrai law law hten mat nna, mung shawa dum nta tsa lam hten hkrum wa sai re.
Ndai lahkawng masum ya Hpakant ginra hta marang matut htu kaba na rai nna, bum gyi ai lam, hka kaba ai lam ni matut byin wa mai ai majaw, mung shawa yawng sadi maja na nga na lam, lamu marang yu maram dap na tsun n dau da ai re.
