Myen Hpyen Masu Hkalem na galaw ai Ralata poi na lung wa ai Amyusha Rapdaw datkasa hpawng hpe dai ni Naypyidaw kaw galaw hpang nga sai re.
2021 Ning Gumshem Myen Hpyen Dap daru magam zing kau ai nna, amyusha rapdaw ningbaw n nga ai majaw, Rapdaw ningbaw hte ningtau ningbaw yan hpe lata san lu na matu Tingnyang Up lata ai hta, Hpawmi Nbrang Doi Bu hpe Rapdaw Ningbaw the Ningtau Ningbaw hpe lata ai ten, Tingnyang Up shara gan jaw wa ai hpe mu lu ai re.
Hpawmi Nbrang Doi Bu Tingnyang Up galaw nna, amyusha rapdaw Ningbaw lata san ai hta, Myen Hpyen Dukaba Usa, Salang Awng Lin Dwe hpe Amyusha rapdaw ningbaw lata dang san wa nna, Ningtau rapdaw Ningbaw hpe gaw, Slg Jenghpang Naw Tawng hpe lata san wa ai re.
Dai ni lata san wa ai hpe maram yu yang, Jinghpaw ni hpe ram ram shara jaw wa ai hpe mu mada lu ai nga, Mung masa yu maram ai ni tsun ai re.
Mung Shawa Rapdaw Ningbaw the Amyusha Rapdaw ningbaw ni hpe lata san ngut sai re majaw, Mung Shawa rapdaw hte Amyusha rapdaw lahkawng pawng nna, Gumsan magam lata na sha ra sai lam chye lu ai.
Gumsan Magam lata na matu, Myen Hpyen dap hkyen shajin da ai masha ni gaw, Gumsan Magam Min Aung Hlaing litla na rai nna, Ningtau Gumsan magam (1) gaw, ya na Myen Mung hkringmang daju Nyo Saw, Ningtau Gumsan Magam (2) shara hpe gaw Hpawmi Nbrang Doi Bu hpe masat da ai nga, rapdaw the ni nawn ai shiga lawk ni hta tsun tawn ai re.
Ndai Amyusha Rapdaw hpawng lamang hta Jinghpaw Mung KSPP na Dr Manam Tu Ja mung sa du lawm taw ai hpe mu lu ai re.
Gumshem Myen Hpyen dap gaw, 2020 ning ra lata poi hpe Sindan pa jahpan shut ai lam the, n tara ai ralata poi re ngu mara the daru magam zing kau wa ai rai nga ai.
Myen Hpyen dap daru magam zing kau ai 5 ning na ai hpang, mung shawa madi shadaw shang lawm ai lam n nga, masu hkalem ai ra lata poi hpe galaw dan masu nna, Gumshem Myen Hpyen Dap ningbaw Min Aung Hlaing Gum San Magam galaw mayu ai majaw, Mung Shawa mun lam si hkrum, jam jau hkrum lai wa sai lam, Special Advisory Council for Myanmar(SAC-M) a sumtang laika hta tsun madi madun da ai re.
