Danggu Dang Pyithutsit Hpung ni Ramma ni hpe Kani Dawn ya na lam n dau tim, Mying sa bang ai masha n nga
Putao Machyang Baw Ginr ani hta Danggu Dang Pyithutsit hpung ni kaw na Kani Nang Hpam lu sha ai masha ni hpe Kani dawn y ana matu Mying jahpan hpyi ai rai tim, Mying bang ai masha gadai n nga ai nga, Ginra masha ni tsun ai re.
Rawang Pyithutsit Ningbaw Danggu Dang gaw, Kani Ya Hkyi ni hpe Kani dawn ya na ngu saw shaga taw ai rai tim ya Shata mi jan na wa ai ten du hkra mying jahpan jaw ai masha gadai n nga ai majaw, ya kalang bai n dau laik langai shapraw da ai lam, chye lu ai.
“Kani lusha ai masha ni hpe n lu sha mat hkra Dabang hpaw na kani dawn ya na nga na tsun ai, aten n htoi Shata 3 ram na na nga na tsun ai, rai ti mung gadai kanu kawa ni mung n sa ap ai ga rai nga ai, shan the gaw dai hku kani dawn ya ai zawn rai na, Hpyen dap de atit anang bai shaga woi bang la kau na tsang ai ga rai nga ai,” nga nna, Putao na Salang langai KNG de tsun dan wa ai re.
August praw 4 ya shani bai pru wa ai laika hta Putao Machyang Baw ginra hta Kani dawn mayu ai ramma ni August praw 3 kaw nap raw 6 ya shani du hkra Jubeli lawk na Rawang Pyithutsit Rung de Mying jahpan sa jaw bang ya na lam tsun tawn ai re.
Rai timung ginra masha ni gaw, Pyithutsit dap de atit anang hpyen lahkawn bang la na tsang ai majaw, gadai mying n sa bang ai nga, Putao Kawng Kahtawng na Salang langai mung KNG de n dai zawn matut tsun wa ai re.
“Kasha la kasha lahkawng lu ai, langai gaw Kani lu sha taw ai ya mali ning ram na sai, kani dawn na matu gade tsun tim n lu ai, ya na zawn Kani dawn ya na nga, laika pru wa ai chyawm grai kabu ai. Rai ti mung maga mi de Pyithutsit hpyen rim lahkawn woi la kau ya na tsang ai, dai majaw n gwi sa bang ai,” nga nna tsun dan wa ai re.
Putao ginra hta Myen hpyen dap gaw, amyu shamyit masing hte Kani Nang hpam hpe wang lu wang lang dut garan jaw shangun nna Putao ginra hta Kani Nanghpam lu sha ai Ramma lani the lani grau grau law jat wa taw nga ai re.
Ya ten Putao ginra hta Pyithutsit magam gun na Hpyen la n nga wa ai majaw, ya na zawn gabaw amyu myu shaw nna Hpyen lahkawn na zai ladat tam wa ai re nga, ginra masha ni tsun maram taw ai re.
Myen Hpyen Dap daru magam zing kau ai hpang, Pyithutsit Hpyenla ni dap hprawng hprawng ai masha ni grau grau law wa ai majaw, Dap kata hpyen n gun n nga ma sai nga ginra masha ni tsun ai re.
