Kokang MNDAA hte Myen hpyen dap ni Miwa mung Hkwi Min mare kaba hta December 15, 16 n htoi lahkawng ya hkrum jahta bawng ban wa ai hta hpa mahtai mung n lu ai sha ngut kre mat ai lam sagawn chye lu ai.
Dai hkrum jahta ai lamang hta Myen hpyen dap maga na Maigan hkringmang Ko Ko Oo hte ဆရဖ maga na Dukaba Tan Zaw Oo yan woi awn ai hpung ni hte, Kokang dap maga de na Ningbaw kaba Hpung Da Shwe a kasha Maigan kyithkai dap lithkam Slg Hpung Hkwi woi awn ai hpung ni hkrum jahta wa ai nga, ndai lam hte seng na chye salang langai KNG de tsun dan wa ai re.
Dai Zuphpawng hta lahkawng maga na hpyi shawn wa ai lam ni hpa mung myit hkrum lam n lu wa ai nga dai masa lam hpe chye ai Salang langai ndai zawn tsun dan wa ai re.
“Kokang ni mung ya gaw majan n kam gap sai, shan hte gasat di da lu sai gaiwang hpe Chin Shwe Haw, Lauk Gai zawn laksan uphkang gai wang tara shang masat la nna, gap hkat jahkring mayu sai, Myen hpyen dap maga gaw Lashio hpe bai jaw na matu ding yang hpyi shawn taw nga ai rai nga, dai zawn shada lahkawng maga hpyi shawn ai lam hpe hkap la lu ai lam n nga ai majaw ndai kalang na zuphpawng gaw hpa mahtai n pru ai ga rai nga ai nga,” Mung myit Sinli ginra na hpyen masa yu maram ai Salang langai KNG de tsun wa ai re.
dai zawn hpyi shawn hkat wa ai lam hpe lahkawng maga na gara hpe mung hkap la lu ai lam n nga ai majaw, n-dai kalang na Hkwi Myint zuphpawng hta hpa mahtai mung npru ai hte ngut kre mat ai re.
Ndai kalang na zuphpawng hta hpa mahtai mung n lu wa ai rai tim, matut hkrum bawngban mat wa na ngu ai myit hkrum lam hpe gaw lu da ai rai nna, du na 2025 January shata hta bai matut hkrum mat wa na ngu ai lam hpe myit hkrum tawn lu ai re.
Myen mung kata byin nga ai majan n hpan lam hte seng nna, Miwa Asuya maga ding yang dip n gun jaw ai lam ni nga taw nna, jarit gunrai ginlen chyinghka ni mung yawng pat da ya ai re.
