Myen hpyen dap laknak kaba gap shadam bun ai majaw Langu sun kaw bungli galaw nga ai mung shawa ni hkala hkrum

Waimaw Jamga mare hta laknak kaba si wa hkrat ai majaw, amyu shayi langai bai hkala hkrum wa ai nga, Mun Myat Tse Tana garum ningtum hpung ni kaw na chye lu ai re.

Myen hpyen dap gap shadam dat ai laknak kaba si Waimaw Jamga mare Hting Min langu sun wang hta wa hkrat ai majaw, dai langu sun kaw bungli galaw nga ai asak 25 ning re amyu shayi Ma Aye Noi laknak kaba hkyep hkra nna hkala sawng wa ai re lam tsun ai re.

“laknak kaba si gaw, ginsum kaw gaw n re, sun kaw nan wa hkrat ai, dai kaw bungli galaw taw ai amyu shayi hkala sawng na Waimaw tsi rung sa ai, sawng ai nga nna, Myitkyina de bai shalai kau ai,” nga tsun dan wa ai re.

langu sun kaw langu kahtam nna langu hpai taw nga ai ten wa hkrat hkra ai majaw shingma maga de hkra hkala sawng wa nna, myit tsang ra ai madang re lam chye lu ai.

Jam Ga langu sun shara ni de n dai laman lak nak kaba jahkring hkring wa hkrat ai majaw, bungli galaw nga ai mung shawa ni a matu shim lam n nga myit tsang let bungli galaw sha taw nga ra ai lam bungli galaw masha ni tsun ai re.

Lai wa sai December 10 ya shana maga de hkying 4 ram hta mung, dai langu sun hta sha laknak kaba wa hkrat ai majaw, langu bungli galaw taw nga ai masha marai 3 hkala hkrum wa ai re.

Dai marai masum hkra hkala ai hta, langai gaw hkala sawng nna, tsi rung du ai hpang asak si sum mat ai re lam chye lu ai.

Ya Jamga langu sun de wa hkrat taw nga ai laknak kaba si ni gaw, Myitkyina Myen hpyen dap daju M P Hk kaw na Waimaw maga de gap shadam taw nga ai laknak kaba si ni re lam ginra masha ni tsun maram tawn ai re.

Ndai laman Myen hpyen dap ni Waimaw maga de hpyen n gun jat nna, hpyen shamu shamawt ai lam ni galaw taw nga ai nga ginra masha ni tsun ai re.