Myitkyina Putao lam kaba lapran asak ram ai ramma ni hpe Myen hpyen dap hkrun lam n hkawm shangun

Myitkyina Putao lam kaba lapran Myen hpyen dap maga ramma ni hpe hkawm sa ahkang n jaw hkum pat da ai lam, mawdaw la ni kaw na chye lu ai.

Lai wa sai November 10 ya shani kaw na Putao Myitkyina lam lapran hkawm sa ai ramma ni hpe laja lana san jep nna hkawm sa ahkang n jaw bai n htang shangun kau ai lam, Mawdaw la langai KNG de tsun dan wa ai re.

“Asak ram ai ramma mahkawn shabrang ni hpe tsep kawp n lai shangun ai, Madung gaw ramma ni PDF lata de du mat na hpe tsang ai ga rai nga ai, lai wa sai shaning hta mung ramma grai law hkra PDF de shang mat ai dai majaw rai sam ai ya gaw tsep kawp hkawm na ahkang n jaw mat sai,” nga Putao ginra na mawdaw la langai KNG de tsun dan wa ai re.

Myitkyina maga, Tanghpre mare kaw dung ai Myen hpyen dap ni pat da nna, Putao maga de na gaw Lung Sha Yang mare hta dung ai Myen hpyen dap ni pat da ai lam chye lu ai.

Myen hpyen dap maga de na ya na zawn hkrun lam hkawm ahkang n jaw mat ai majaw, hpaji sharin nga ai ramma ni a matu hkawm sa hkawm wa yak hkak dut dang nga ai re.

KIA hte PDF dap ni Jinghpaw mung shara law law hpe htim shagrawt nga ai ten, ya naw ngam ai Putao ginra hpe mung htim shagrawt wa na  myit tsang ai majaw, Myen hpyen dap maga ya na zawn lam pat wa ai re lam, ginra masha n kau tsun maram nga ma ai re.

KIA hte PDF dap ni jinghpaw mung shara law law hpe lani hte lani htim gasat zing madu taw nga ai ten, du na shaning hta Putao de mung htim gasat zing madu wa na masa nga ai lam hpyen masa yu maram ai ni tsun tawn ai re.