Manmaw majan laja lana gap gasat taw ai ten, Miwa maga KIO ningbaw kaba hte hkrum na lam saw shaga
Wunpawng Mungdan Shanglawt hpyendap KIA Manmaw muklum kaba hpe htim shagrawt nga ai ten, KIO Ningbaw kaba hpe Miwa asuya maga hkrum jahta na matu saw shaga wa ai nga, Dukaba Naw Bu tsun ai re.
Ningbaw kaba Dukaba Nban La woi awn ai hpung ni gaw, December 8 ya shani Laiza kaw na Miwa mung de pru hkawm sa mat sai rai nna, gara shara kaw hpa ni sa hkrum bawngban na ngu ai lam hpe atsawm tup hkrak n chye ai lam Dukaba Naw Bu matut tsun ai re.
“KIO hku na Miwa Asuya hte sa hkrum jahta ai hku n re sha, anhte KIO Ningbaw daw ni hpe Miwa maga de na shaga ai majaw, sa hkrum ai lam rai nga ai, gara kaw hpa ni sa shaga na kun n chye ai, hkrum byin ai kun, n hkrum byin ai kun ma ngai gaw n chye ai, mani hpawt ning kaw na gaw pru mat wa sai, ningbaw kaba nan woi awn na pru mat sai,” nga tsun dan wa ai re.
Jinghpaw mung hte Miwa jarit ma hkra ngu na ram hpe KIA htim gasat zing madu kau ma ai hpang, Manmaw mare kaba hpe matut htim shagrawt taw nga ai ten, ya na zawn Miwa maga de na hkrum na matu saw shaga wa ai lam rai nga ai.
Ya na zawn, KIO wuhpung hpe Miwa asuya maga saw shaga ai lam gaw, Manmaw htim shagrawt majan hpe jahkring ya na matu shing n rai, jarit mayan hpaga chyinghka lam ni bai hpaw na lam hte seng na bawng ban jahkrup na masa nga ai lam mung masa yu maram ai Salang langai KNG de n dai zawn tsun maram da ai re.
“ Miwa saw shaga wa ai lam gaw mahkrun lahkawng mai byin ai ngu maram lu ai, langai gaw jarit hpaga lam ni bai hpaw na lam hte seng na, lahkawng ngu na hta gaw, Manmaw majan hpe jahkring ya na matu dai lahkawng mai byin ai,” nga tsun maram da ai re.
Dukaba Nhpang Naw Bu tsun ai hta Miwa Asuya hte KIO maga shata mi hta kalang lahkawng lang ding yang hkrum ai lam nga ai nga matut tsun dan ai re.
Chihpwi, Pang Wa, Kanpaiti ginra yawng hpe KIA htim gasat zing madu kau ma ai hpang, Jinghpaw mung hte Miwa jarit chyinghka yawng hpe Miwa maga yawng pat kau nna, majan n shabyin na matu ding yang tsun taw ai mung rai nga ai.
Miwa maga na dai jarit mayan hta majan n shabyin na matu dip n’gun jaw tsun shadut taw ai rai tim, KIA maga Zahkung Ting Ying up hkang ginra yawng hpe shata mi jan laman hte yawng htim gasat zing madu kau ma ai re.
Dai ginra yawng hpe htim gasat zing madu kau la ngut ai hte rau, Jinghpaw mung a matu ahkyak dik shara langai rai nga ai Manmaw mare kaba hpe matut bai htim shagrawt taw nga ai re.
KIA maga ya na zawn muklum kaba ni hpe laja lana htim shagrawt taw nga ai ten, Miwa maga na saw shaga let hkrum jahta wa ai lam hte seng nna, mung shawa yawng myit shang sha taw nga ai re.
Lahta Sam mung yawng hpe Balawng TNLA hte Kokang MNDAA htim gasat zing madu kau ma ai hpang, majan matut n shabyin na matu Miwa maga dip n n’gun jaw hkrum wa ai re.
Miwa maga na dip n’gun jaw wa ai majaw, Kokang hte Balawng dap maga na mung, simsa lam mung masa lam bawng ban jahkrup na lam hte seng na jin jin re lam, n dau laika shapraw wa ai re.
