Naw Mung mare hta tsi mawan dumhprut taw ai majaw, mung shawa ni tsi tsi na matu yak hkak
Jinghpaw mung dingdung Putao Naw Mung mare hta tsi mawan dumhprut wa ai majaw mung shawa ni tsi tsi na matu yak hkak wa taw ai lam ginra masha ni tsun ai .
Lai wa sai June shata kaw na myen hpyen dap maga Naw Mung tsi rung kaba de tsi nshalai mat ai majaw tsi rung kata tsi mawan dumhprut wa taw ai majaw, machyi masha ni tsi tsi na yak hkak taw ai nga Naw Mung hta nga ai amyu shayi langai KNG de tsun dan ai re.
“tsi rung kaba hkan gaw tsi njahkrat ya sai nga tsun ai,…hpa tsi nan nnga taw sai..machyi na tsi tam yang pi nmu ai shata 5 daram re sai, paracetamol tsi pi nnga ai masa re. jahkru na sa madun yang pi tsi gaw shinggan kaw sha mari ra ai..shanhte gaw hpa ana byin ai re nga tsun dan ya ai hku sha re taw..raitim yak ai gaw tsi ni shinggan kaw ma tam yak ai” nga nna asak 30 ning ram re amyu shayi langai tsun ai re.
Naw Mung de tsi n shalai mat ai majaw, lai sai ten kat mi hkying mi sha jaw ra ai Paracetamol hpe ya ten dai tsi kat mi hkying masum the mari lang ra taw nna, biogesic tsi langai hpe kyat manga tsa(500) lai sai ten gaw langai kyat lahkawng tsa(200), Decolgen langai kyat manga tsa manga shi(550) lai sai ten kyat lahkawng tsa manga shi(250), Anavency langai kyat hkingmi matsat tsa(1800) lai wa sai ten kyat manga tsa(500) du hkra manu rawt mat ai re.
“Ya yang gaw paracetamol tsi kat mi hpe hking 3 ram jaw ra ai.. ngam ai tsi ni mung grai hpu ai.. dai majaw nkau nga yang bum tsi ni hte tsi taw nga ma ai..tsi ni nlu mari sha na tsawmra gaw yak taw nga ma ai “ nga tsun ai re.
Jinghpaw mung de Myen hpyen dap maga lai wa sai, August shata kaw na tsi mawan tsep kawp n shalai mat ai re.
Jinghpaw mung de du ai tsi mawan law malawng nbungli lam hku na du wa ai tsi mawan ni rai nna, hkrun lam yak hkak ai Naw Mung zawn re ai shara ni de gaw, shawoi na zawn n du mat ai majaw, yak hkak taw nga ai mung rai nga ai.
