Hpakant Uru hka kaba wa ai majaw, Hpakant mare na mung shawa hkying kaba hka hpyen hkrum taw nga ai lam chye lu ai.
Ndai laman Hpakant de marang ding yang htu kaba taw nga ai majaw, Uru hka hte Nma Hka kaba wa nna, Lung Hkang, Mazup Yang hte Hpakant lamu ga nem ai shara ni hta hka shang nna, dai shara hkan na mung shawa yawng tinang shim lum ai shara ni de hprawng yen taw nga ra ai lam Hpakant ginra masha ni tsun ai re.
“Hka gaw tsawm ra kaba wa ai, mana kaw na kaba hpang wa ai, Kaung Pyi Sau seng kau chyen mung lawm mat sai, yemase nta ginsum nkau mung lawm mat ai, ya yawng gaw hpaji jawng hte nawku jawng wang ni hta hprawng yen taw nga ai ga rai nga ai,” nga tsun ai re.
Hka kaba wa ai majaw, Awng Ra mare na dum nta 5 daram hka hta yawng lawm mat nna, Hpakant lung seng n hkun kata ni de hka kaba shang ai lam ni a majaw, hka n htang hku ni lwi hkrat nna, mung shawa ni grau jam jau hkrum taw nga ai re.
Hpakant Hka Hpyen hkrum ai shara ni gaw, San Hka, Mading yang, Mazup Yang, Lung Hkang, Hpakant Myoma, Ngapyaw Taw, Mashi Kahtawng, Ayemyatharyar, Maw Mung mare na mung shawa hkying mi jan hprawng yen ra taw ai re.
Ya ten dai hka hpyen hkrum ai hpyen yen mung shawa ni gaw, Nawku Jawng, Hpungkyi Jawng, Hpaji jawng hte jinghku jingyu nta hkan mai byin ai hku machyu shingbyi nga nna, malu masha garum ningtum ra taw nga ai re.
Ya na zawn hka kaba wa ai majaw, Kaung Pyi sau seng hte laga ye mase la ni rawng ai dum nta ginsum shi kahtap hka hta yawng lawm mat ai lam ni nga ai re.
Dai na maga de kaw na Uru hka gau ngwi ngwi yawm wa taw sai re lam, ginra masha ni kaw na chye lu ai.
