Myen Hpyen Dap Maga Jinghpaw Mung Kata Jak Sau Pru Shang Lam Hpe Pat Hkum Nga
![](https://kachin.kachinnews.com/wp-content/uploads/2024/06/Saumawdaw-Sumla-2-1.webp)
Mandalay kaw na lung wa ai jak sau htaw mawdaw kaba hpe Myen hpyen dap maga Namsi Awng mare hta pat hkum da nna, jak sau htaw mawdaw kaba langai hta hkawn kang Sen 200 hta taw nga nna, lani mi hta mawdaw kaba 5 hpe sha shalai yaw taw nga ai lam mawdaw la ni kaw na chye lu ai.
Myen hpyen dap maga na lani mi sau htaw mawdaw kaba 5 hpe sha shalai ai majaw, Namsi Awng hte Indaw shagyit ni hta Mawdaw kaba tsa lam pat hkrum taw nga ai re lam, Myitkyina Mandalay mawdaw la langai KNG de tsun ai re.
“Myen hpyen dap maga na sau htaw mawdaw kaba langai hpe sen 200 hpyi ai da. leng 12 mawdaw kaba nga yang sen 50, lani mi mawdaw 5 daram hpe sha shalai ai, ya gaw dai gumhpraw n lu jaw na mawdaw la ni la ding gren jawng taw nga ai, ya dai kaw sau htaw mawdaw latsa jan ding gren taw nga ai” nga tsun ai re.
Myen hpyen dap maga hpyi ai gumhpraw nau law ai majaw gumhpraw n lu jaw ai mawdaw law malawng dai hku naw matut la taw nga nna, ya ten Namsi Awng hta sau htaw mawdaw latsa jan pat ding gren taw nga ai re.
Mandalay de na lung ai sau htaw mawdaw ni pat hkrum taw nga ai n htoi 10 ya jan na wa ai majaw, Jinghpaw mung sau seng law malawng pat da ra ai hpe chye lu ai.
Lai wa sai ten Miwa mung maga de na shang ai jak sau ni nga ai rai tim, n dai laman Kanpaiti lam de Myen hpyen dap hte KIA dap lapran majan gap gasat wa ai majaw, dai lam kaba hpe mung Myen hpyen dap maga pat da ai re.
Myen hpyen dap maga Jak sau shang ai lam ni hpe pat kau ai sha n ga, jak sau hkawn kang ni hpe kalang lata manu law dik hkra hta ai majaw, Jinghpaw mung hta jak sau manu tsaw rawt taw nga ai re.
Ya ten Myen hpyen dap hte KIA PDF pawng hpawm dap ni lapran hpyen masa shaja hkat taw nga nna, Jinghpaw mung de shang ai Jak sau ni hpe Myen hpyen dap kaw na jum tek mayu wa ai masa hte ya na zawn galaw wa ai re nga, rawt malan hpung maga na tsun da ai re.