Sadung Myen hpyen byuha dap kaba hpe KIA dap maga dai na maga hkying 5 daram hta htim gasat zing madu la lu sai lam, shawng lam magam gun hte ni nawn ai ni kaw na chye lu ai.
Sadung Byuha dap hte dai mayan hta nga ai dap shara yawng ngu na ram hpe KIA dap maga June 11 ya jahpawt jau hkying 4 daram kaw na htim gasat hpang wa ai gaw, Sadung Myen hpyen dap hpe dai na maga de hkying 5 hta yawng zep zi htim gasat zing madu la lu sai nga, shawng lam magam gun hte ni nawn ai magam gun langai KNG de ndai zawn tsun dan wa ai re.
“Dai hpawt kaw na htim gasat ai dai na maga de a tsai sha padang dip zing madu la kau lu sai, ngut na dai ni shani ka-ang ten ram hta Lahpai mare na Myen hpyen dap hpe mung zing kau lu sai” nga tsun dan wa ai re.
Dai dap shara hpe htim gasat ai hta, Myen hpyen dap maga dai ni shani ka-ang ten nbungli hpan hkum hte wa gap bun wa ai lam nga ai hpe chye lu ai.
Majan laja lana gap gasat hkat wa ai majaw, Sadung mare na mung shawa yawng tinang man ang ai nam maling ni de hprawng yen ma nna, n kau tinang dum nta wang kata ga gaduk n hkun hta makoi rawng wa ai re nga ginra masha ni tsun ai.
Dai ni lani mi laman hta dai lam mayan de na Myen hpyen dap shara yawng ngu na daram hpe KIA kalang dat htim gasat wa ai hta, ahkyak ai dap shara ni hpe htim gasat zing madu la lu wa ai re.
Ya htim gasat zing madu la lu ai dap shara ni gaw, Chihpwi lam numbraw na deng 13 shagyit, Bum Tawng Pyithutsit dap, Sadung Byuha dap, Lahpai Mare Myen hpyen dap ni hpe htim gasat zing madu la lu wa ai rai nga ai.
Waimaw Kanpaiti lam kaba n tsa hta Masat (1003) jarit sin hpyen dap kaba nga ai rai nna, ya matut naw ngam nga ai Myen hpyen dap shara ni hpe htim gasat taw nga ai re.
