Myitkyina Putao lam hpe Simsa lam akyu galaw hpung PCG ni lapran salang tai ya ai hte gunrai htaw mawdaw 14 June 8 ya shani Myitkyina Kaw na Putao de lung wa sai re.
Dai Mawdaw 14 hta Jak Sau, N-gu tsep kawp n htaw shangun nna, laga malu masha hte arung arai ni hpe sha htaw na ahkang jaw dat ai re lam chye lu ai.
Myitkyina Putao mawdaw lam kaba hpe majan n hpan a majaw, lai wa sai March 9 ya shani pat kau ai gaw shata masum hkawt na ai hpang, ya na zawn PCG lapran salang tai ya nna, mawdaw 14 hpe lung na ahkang jaw wa ai rai nga ai.
Mawdaw pru na ahkang lu tim, Jak Sau hte N-gu nhtaw shalai shangun ai a ntsa, mung shawa langai ndai zawn tsun ding lun da ai re.
“Jak Sau hte N-gu n htaw shalai shangun ai ngu gaw hpa lachyum n pru ai, kaja nan ra ahkyak taw nga ai gaw jak sau hte n-gu le, dai hpe n htaw shangun ai nga yang gaw mung shawa ni a matu gade hpa akyu pru na n re,” nga tsun ai.
Ya na zawn shata masum hkawt Putao lam pat mat ai majaw Putao ginra hta gunrai malu masha hte jak sau ni yawng dum hprut mat nna, mung mare masha ni yak hkak jam jau hkrum nga ai re.
Myitkyina Putao lam hpe wang lu wang lang hpaw dat ai n re sha, ndai laman mung shawa ni a mayak lam ni hpe gan hparan lu na matu masat da ai gunrai ni hpe htaw shalai ahkang jahkring gan jaw dat ai masa ram sha re lam chye lu ai.
Putao de gunrai htaw na matu Myen hpyen dap နယ်လုံဝန်ကြီး a madi shadaw laika lu ra na re lam chye lu ai.
Ya ten Putao ginra hta jak sau hte malu masha yak hkak dum hprut wa taw nga ai majaw, dai ginra na mung mare masha nkau hpa hpa sha nna, tawt lai ra taw nga ai re.
