Dawhpum Yang Hte Nmawk Mare Lapran Na Mung Shawa Yawng Munglai Hka Sinna Maga Sam Mare De Hprawng Yen
Laiza hte Dawhpum yang mare makau grup yin hta hpyen majan laja lana gap gasat hkat wa ai majaw, Dawhpum Yang hte Nmawk mare lapran na, Myothit, Kung Law mare hkan na mung shawa ni Nmawk mare kaba hte Man Nawng, Nam Yi mare ni de hprawng yen taw nga ai lam chye lu ai.
Myitkyina Manma lam kaba n tsa na, Myen hpyen dap shara ni hte Dawhpum Yang, Num Lang, Kung Law mayan na dap shara ni hpe KIA dap maga ma ja htim gasat hpang wa ai majaw, mare kahtawng 20 jan na mung shawa 5000 jan gaw, Munglai Hka a sinna maga sam mare kahtawng ni hta hprawng yen taw nga ai nga, dai ginra na mung shawa langai KNG de tsun dan wa ai re.
“Hpyen yen yawng gaw Nmawk Manmaw de n mai lai mat ai majaw, Munglai hka htaw ra hkran maga Sam mare ni hta mai byin ai hku hprawng yen taw nga ga ai, hpungkyi jawng ni hkan mai byin ai hku machyu shingbyi taw nga ga ai,” nga tsun ai re.
Hpyen yen mung shawa ni Manmaw Nmawk de n mai lai yu mat ai majaw, dai mayan na mung shawa hkying kaba gaw, Munglai Hka a sinna maga Man Nawng, Nam Yi, Nyaung Paw, Nam Hkum mare ni hta hprawng yen taw nga ai re.
Myen hpyen dap daru magam zing kau ai hpang, Dawhpum Yang ginwang kata ya na zawn mare nawng hprawng yen ai gaw, ndai kalang shawng ningnan lang rai nna, laga mare kaji ni gaw lai wa sai 2022 ning hkan mung hprawng yen sai rai nna, nkau ndai kalang hte rai yang, 4 hprawng yen ai ni mung lawm sai lam chye lu ai re.
Ya ten dai hprawng yen taw nga ai mare kahtawng ni gaw, Dawhpum Yang, Numlang, Kung Law, Tali, Taw Pe, Nam Ding, Jehkam Myothit, Phyo Hkai, Ma Hkwi, Loi Je Hpak Gyi hte Pan Kawng Mu mare kahtawng ni re lam chye lu ai.
Dai mare kahtawng na mung shawa n kau lai wa sai majan rai n byin shi ai ten kaw na, majan laja wa na masa nga ai majaw, asak kaba sai ni hte num ma n kau tau hkrau kaw na hprawng yen taw ai lam ni mung nga taw sai hpe chye lu ai.
