Shiga

Lungseng Company Wang Hta Rim Hkrum Ai Mung Shawa Ni N Lawt Shi Ai

Hpakant, Mawmaw Layang hte Mawwan Gi mare lapran na lung seng company langai hpe Myen hpyen dap ni htim shang ai ten rim hkrum mat ai lungseng htu masha marai 20 jan lawt pru wa ai lam rai n nga shi ai re.

May 27 ya shana hkying 9 daram aten hta, 111 company hpe Myen hpyendap ni hpyen n’gun kaba hte sinat ni gap kapaw let shang wa nna, lung seng tam ai masha marai 20 jan hpe rim woi mat ai lam Hpakant buga masha langai KNG shiga dap hpe tsun dan ai re.

“Lung seng tam ai masha ni sha marai 20/25 ram lawm mat ai. Company kaw na masha ni lawm n lawm gaw n chye ai. Lung seng tam ai masha ni gaw lawm mat ai re. Dai ni du hkra n lawt wa shi ai’’ nga nna tsun ai re.

Dai Myen hpyendap ni gaw, Hpakant Byuha kawng kaw na yu wa ai Tatma 77 n pu na hpyen hpung ni re lam chye lu ai.

Myen hpyen dap daru magam zing kau ai hpang, Hpakant kata Myen hpyendap gaw company wang kata hta nan dap jung shara jahkrat nga ai lam, lung seng tam masha ni hte company magam gun ni hpe rim ai lam jahkring hkring galaw nga ai re.

May 25 ya shani hta mung, Lunghkang mare Uru Hka manam jarawp hpe Myen hpyendap marai 30 daram sa wang shinggrup nhtawm, mung shawa la marai 5 hpe rim woi mat wa ai re.

2021 hpang, Hpakant ginra lung seng htu masing yawng jahkring da na matu Myen hpyen dap kawn sadi jaw ndau ai lam 4 lang tup galaw ai re.

Raitim maga mi de Myen hpyen dap hte rau galaw sha nga ai company ni hpe shimlam du hkra la ya ai rai nna, Myen hpyen dap ni nlu ka-up ai lung seng company shara ni hpe gaw ya na zawn shang rim zing ya ai lam ni jahkring hkring galaw nga ai re nga nna, ginra masha ni tsun ai.

Related Articles

Back to top button