Laklak lai lai KIO Ginjaw Ginra ntsa hku nna, jet fighter (jet majan pyenli) langai, January praw 7, Bat Lahkawng Ya shani, 5 lang n ga ginhkrang pyen gayin wa sai lam, KIO du salang ni hku chye lu ai.
Myen jet ngu maram lu ai dai nbungli gaw aten pyen 2pm a hpang, Miwa jarit kata Yinjiang, Na Bang hte Jang Hkawng de mung pyen shang wa ai lam, Laiza buga masha ni tsun ai.
“Dai hpyendap hkan hkan sha hkan gayin taw nga ai. Majoi hka hkan na hkan gayin ai gaw n rai na gaw. Nang anhte shanglawt hpyendap hkan hkan gawan,” nga nna KIA du kaba langai Jinghpaw Shiga Dap KNG de tsun ai.
Myen jet ngu maram lu ai gaw, Jinghpaw Mungdaw a sinpraw hkran Myen-Miwa ga jarit mayan, Laiza, Laisin, Hpalap Bum hte Mai Ja Yang hku, grau nna KIA hpyendap ni ntsa hku dasang sha-ding pyen wa ai re.
Dai nbungli hpe gap na matu shawnglam dap ni lahta tsang salang ni hpe shiga shana ai raitim ‘hpa mahtai n jaw’ ai nga, Lahta na KIA du kaba tsun ai re.
Shawng shani, January praw 6 hta Laiza, Padang Rung e KIO hte Rahkai AA ningbaw ni gaw, san san rai, Miwa asuya salang ni hte, hkrum shaga wa sai hpang, ya na zawn n-sam ahpraw hte jet pyenli, KIO Ginjaw Ginra ntsa hku pyen gayin wa ai re nga, KIO salang ni tsun ai re.
Dai Miwa salang ni gaw, December shata hta Kokang MNDAA hte Balawng TNLA salang ni hte Mungla kaw hkrum wa sai re lam, sagawn chye lu ai.
Dai wuhpung mali gaw, Myen hte bilateral gap hkat jahkring sen htu lu hkra, ndai shata htum de mung bai hkrum hkat na matu hkyen lajang tawn ai re.
