Tag Archives: Syria

Syria Majan: Rasha hte US, hpyen mawdaw hte adep hkat

Syria sinpraw-dingdung kaw, Rasha hte US hpyen mawdaw adep hkat ai kaw US hpyenla nkau hkala hkrum ai manghkang hta mungdan lahkawng shada mara shangun hkat nga ai re.

Adep hkat ai video hpe Rasha mungtsaw myutsaw website, Rusvesna.su hta shapoi ai hpe, kahtap htawn shabra dat ma ai re.

Video hta Rasha zaibru jang hpyen mawdaw yan na mawdaw langai gaw US hpri makawp mawdaw langai hpe wa adawt manga nga ten, Rasha helicopter langai makau kaw anyep sha pyen gayin ai hpe mu lu ai.

US gaw gawan hkawm ai hpe hkum shadang ai nga nna Rasha tsun ai.

Ndai shiga hpe bat Masum, Aug. 26 hta shabra dat ai re. Rasha Makawp Maga Hkringmang Dap tsun ai hta, dai ginra kaw gawan hkawm na lam nga ai hpe jau kaw nna US hpe sadi jaw tawn sai, nga ai.

“Dai daitimung, myit hkrum ai ni tawn da ai hpe tawt lai nna, US hkarang dap hpyenla ni gaw Rasha gawan hkawm ai hpe pat hkum shakut ai re,” nga, hkringmang dap tsun ai hpe Tass shiga dap tang madun ai.

“Dai lam hkap htang ai hku nna, tsun da ai masing dik tup wa hkra manghkang koi yen lu na matu, n galaw n mai ahkyak la lam hpe Rasha hpyen balik galaw ai re.”

White House Amyusha Shimlam Kongsi (NSC) tsun ai hta, Rasha mawdaw langai US bawm-ninggang hpri-makawp mawdaw langai hpe wa ahtu adawt ai majaw, “mawdaw kata magam gun ni hkala hkrum ai lam nga ai.”

Baw ahtu agawk hkra ai US hpyenla mali, n sawng ai, baw sin malap ai lam byin ai nga, mying n tsun mayu ai US hpyendap shiga lawk langai hpe lakap nna Politico website hta tang madun ai.

Syria sinpraw-dingdung daw hta, US dap ni hte byin ai manghkang law law nga ai re. Lai wa sai bat mi jan hta Rasha-shingdu Syria a jinghku dap ni a gap hkrum ai lam ni nga wa sai.

Lai wa sai 2018 February shata hta, Rasha chyee-sarr hpyenla (shabri shabrai hpyenla) n-gun kaba hte madung wan sau pru shara makau na US dap shara ni hpe wa htim gasat wa sai. Shanhte hkala nba kaba hte shingla gasat nhtang kau ai hkrum yu masai re.

Ya bai byin ai manghkang gaw n bung ai. Tara shang Rasha hte US hpyen hpung lapran dingtawk man ap nan ga law hkat ai lam rai nga ai. Ndai mabyin gaw manghkang byin shangun ai sat lawat langai re majaw Amerikan ni ninghkap ai re. Rasha gaw ginra kata jawm myit hkrum da ai lam ni hpe n hkan sa ai sha, da sang US dap ni hpe ginjang jaw nga ai re nga, mara shagun ai re.

Ya ten, hpa majaw ndai lam byin wa ai kun? US gaw Syria kaw nna pru wa sai mahkrun re ai hku Moscow sawn la ai re. Maning October hta, Gumsan Magam Donald Trump kaw nna mying kaba ai dawdan lam galaw wa sai: dai gaw Kurdish jinghku dap ni hpe garum na sa da ai US hpyen n-gun 1,000 hpe dawm la ai lam rai nna, hpang e myit loi bai galai nhtawm, kasu kabrawng law dik ai shara hta hpyen n-gun loi naw ngam da ai re.

Dai raitim, Trump gaw Washington a maigan de jahkrat tawn ai hpyen n-gun shayawm mayu ai masa hpe Rasha chye da ai. Dai re majaw Amerikan ni pru ai hpe chye shangun mayu ai yaw shada lam hte Rasha galaw ai ngu sawn lu ai re.

Ya ten du hkra dai ginra kaw naw ngam nga ai US hpyen n-gun yawng 500 daram sha rai nna, IS (Islamic State jihadists) ni bai n rawt wa hkra, shimlam la ya nga ai re. US hpyendap gaw Kurd rawt malan hpung woi awn ai, SDF (Syrian Democratic Forces) daphpawm hpe garum nga ai re.

Politico hta NSC na ga tsun ahkang lu, John Ullyot, tsun ai gaw, Aug. 25, bat Lahkawng, buga ten 10:00 am grup yin ten, galoi mung galaw nga ai shimlam gawan hkawm ai shaloi Rasha hpyen hpung hte Syria sinpraw-dingdung Dayrick makau hkrum katut nna manghkang byin wa ai re nga, tsun ai.

Shi tsun ai hta, US mawdaw wa adep hkrum ai majaw Rasha hpyendap hpe ninghkap ai hte, “manghkang n kaba wa hkra’ daphpawm gawan hkawm hpung gaw dai shara kaw nna pru le mat ai lam tsun ai.

“Rasha dap a jahte tam ai sat lawat ni (unsafe and unprofessional actions) gaw 2019 December hta United States hte Rasha myit hkrum da ai manghkang shayawm na ga shaka hpe tawt lai ai lam madun ai re,” nga Mr. Ullyot tsun ai.

IS hte kaga gumlang hpung law law hpe gasat shamyit nga ai Syria Gumsan Magam Bashar al-Assad a hpyendap ni hpe Rasha gaw hpyen n-gun kaba hte garum ai kaw, bawm jahkrat nbungli kaba ni du hkra, lawm ai re.

 

Syria mawdaw bawm kaw Rasha hpyenla ni hkala hkrum

Syria sinpraw-dingdung maga, July 14, bat Lahkawng Ya, shani byin ai mawdaw bawm langai kapaw hkrup ai kaw Rasha hpyenla nkau hkala hkrum wa sai.

Turkey-Rasha ginrun hpyen gawan ai Idlib ginwang, M4 lam nmaw kaw mawdaw bawm kaba dem hkrum ai kaw Rasha hpyenla n law dik masum hkala hkrum ai nga, Bild’s foreign policy editor Julian Röpcke tang madun ai.

Russian Reconciliation Center for Syria announced Tuesday also said that three Russian servicemen sustained light injuries in an explosion in Syria’s Idlib during a joint patrol with Turkish counterparts.

Syria hte seng ai RRC (Russian Reconciliation Center) kaw na Bat Lahkawng Ya shani tsun ai hta, ginrun gawan hkawm nga ten bawm kapaw hkrum ai kaw Rasha hpyen magam gun masum ningma n sawng ai hte hkala hkrum ai lam, tsun ai re.

Ndai bawm kapaw hkrum ai hpang, ginrun hpyen gawan hkawm ai hkring taw ai lam chye lu ai.

Syria dinghku majan byin hpang ai ten, 2011 hta e Idlib hpe Syria rawt malan hpung ni zing madu yu sai re.

2012 kaw nna, Rasha shingdu garum ya ai hte Syria gumshem asuya hte jinghku dap ni bai zing la ai hpang, M4 Lam snr Aleppo-Al Hasakah lam hta Turkey-Rasha ginrun hpyen gawan ai lamang hpe daining March 15 kaw nna hpang na myit hkrum da ai re.