Danai Myen Hpyen Dap kaw na KIA Dapba Dapdung ni de Sucide Drone gap bun
Danai D.K.Ts kaw na Sucide Drone 3 KIA Dapba (2) ginra de gap bun wa ai lam KIO Shiga lawk ni kawn chye lu ai re.
November praw 3 ya shana hkying 4 chyen ten, Danai D.K.Ts dap shara kaw na Sucide Drone 3 hte KIA Dapba (2) Awnglawt mare de sa gap bun wa ai lam nga ai hpe chye lu ai.
Dai hpang shana hkying 7 chyen ten daram hta mung KIA Dung (14) maga de mung Sucide Drone langai hte sa gap bun wa ai lam nga ai hpe chye lu ai.
Myen Hpyen Dap hte Pyithutsit hpyen hpung ni gaw ya ten Danai Hugawng lam mayan de mung hpyen n gun jat nna, hpyen shamu shamawt ai lam ni galaw nga ai hpe chye lu ai re.
Myen hpyen maga na Danai lam mayan hpyen shamu shamawt ai lam galaw nga ai ten, Jahtuzup Sanpya mare kaw Min Zay Thant woi awn ai Pyithutsit hpyen hpung ni gaw, Mungdan madang Yungwi ninghkring sumla hkrung shayi ni hpe shaga nna, poi lamang kaba galaw nga ai re.
Dai poi lamang kaba hta madung hpaida wang ni hpaw nna gumhpraw tam nga ai lam hpe mu lu nga ai re.
Dai ginra na Ja htu lauban ni yawng hpe dai poi lamang de n sa n mai saw shaga ai lam ni nga ai hpe matut chye lu ai re.
Myen hpyen maga ya na zawn KIA dapba dap dung ni de Sucide drone sa gap bun wa ai lam gaw, Min Zay Thant hpe shim lam la ya ai masa re nga, KIO Shiga lawk hta tsun tawn ai re.
Jahtuzup Sanpya mare na Min Zay Thant woi awn ai poi kaw Myitkyina kaw na lung wa ai Myen hpyen mawdaw lahkawng, hpyen n-gun 100 daram hte shim lam la ya nna, poi kaba galaw taw nga ai lam re nga, ginra masha ni tsun tawn ai re.
