Hkrunlam hpaw sai rai tim Myitkyina Muklum kata gunrai manu yawm ai lam n nga, grau grau tsaw rawt taw ai nga ginra mung shawa ni tsun ai re.
Myitkyina kaw shawoi Sen 10 daram sha nga ai Jak kaji ni mung, ndai laman hta gaw, Sen 15 jan du mat ai kaw na yawm de n nga, tsaw rawt de hkrai re lam Maw ginra de gat dut ai amyu shayi langai KNG shiga de n dai zawn tsun ai.
“Myitkyina ga kaw n hpu ai hpa n nga ai, Jak kaji ၅၊၆ jak Honda hka chyup jak ni shawoi sen 10 makau grupyin sha nga ai rai tim, ndai laman gaw Sen 15 jan hkrai nga mat sai, hpa mung grai hpu ai, lu tam ai hte mari lusha ra ai n kaik ai,” nga tsun ai re.
Myitkyina kaw ya na zawn gunrai manu tsaw rawt ai lam gaw, hpyen masa a majaw hte lanam ta lam hten nna re chye lu ai.
Ya ten Myitkyina Mandalay lam hkrang sai rai tim, Koi lam hku na naw shakut lai ra taw ai majaw, lam lapran n htoi bat mi daram na ai majaw, yet wa hten wa ai gunrai nkau lam lapran yet hten law ai majaw Myitkyina kaw gunrai manu n hkrat ai lam re nga, Myitkyina kaw gat dut ai myu shayi langai KNG shiga de n dai zawn tsun dan ai re.
“Myitkyina kaw dut ai rai ni law malawng gaw lawu ga de na lung ai gunrai ni hkrai re, lam lapran kaw bat mi ram na ai, dai bat mi ram na ai kaw gunrai n kau yet hten mat ai, ga shadawn Udi, Bahkri si zawn re ni gaw, lam lapran kaw yet hten baw mat ai ni law ai majaw dai ni hpe bai tsan kau ai rai yang, arang ngam hkra nga jang gaw manu grau sharawt ra ai hku byin ai,” nga tsun ai re.
Ya ten Myitkyina kaw Bahkri Si joi mi 7000, Miwa Udi langai 800, Myitkyina Udi langai 1100, Shakau hkyeng joi mi 1000, Shakau hpraw joi mi 10000, Shanam joi mi 12000, Nai kyi (အားလူး) joi mi 5000, Ga Shapre(မြေထောက်ပဲ) 11000, Gala shapre (ကုလားပဲ) joi mi 10000, jum htuk mi 2500, Sha sau tau mi 15000, Super Coffee htuk kaba langai 25000 manu nga ai lam chye lu ai.
Ndai laman Myitkyina de Miwa hte Mandalay lahkawng maga na gunrai ni bai shang taw sai rai tim, gunrai manu yawm ai lam n nnga grau grau tsaw rawt ai lam gat dut num ni tsun ai re.
Miwa de na shang ai gunrai ni hpe Salang Naw Li woi awn ai Pyithutsit ni, gunrai manu hkawn kang hkap hta taw ai majaw, gunrai manu n yawm ai sha mi lung ai manu hte raw matut na dut ra ai masa re nga, gunrai htaw ai mawdaw la ni tsun ai re.
