Myen Hpyen dap daru magam zing kau ai hpang, Mungdan kata mung shawa n-gun hpungtum hte n’gun madun lamang ni hte rau mungmasa, hpyen masa lam yan amyu myu galai shai lai wa sai rai nga ai.
Amyusha rawt malan hpung nkau gahkyin gumdin wa ai zawn, nkau rawt malan hpung shada gap hkat ai lam, dap hpawm amyu myu paw pru wa ai zawn, nkau hpawng chyawm ai lam ni gaw shiga sha pru nna tatut hta galai shai ai lam nmu lu ai sha, mat mat ai wuhpung ni hpe 5 ning laman hta masam maram lu ai re.
Myen amyusha hte ginra hpe mahta ai mung masa hpyen masa rawt malan wuhpung kaji kaba law law pru ai kaw nna CRPH hte KIO/KPICT lapran myit hkrum lam hte Jinghpaw mung ginra hta hpyen majan rau shang taw ai hpe mu lu ai re.
Daru magam zing ai 5 ning hpring ai ten, CRPH, NUG hte Hkang, Karenni, Karen hte Shanglawt KIO shang lawm ai Steering Council for the Emergence of a Federal Democratic Union (SCEF) hpe hpaw shabawn ai lam lai wa sai March Shata hta ndau ai hpe yawng chye chyalu rai nga ai.
SCEF ndau da ai mungmasa pangdung 6 hta Myen Hpyen dap hpe mung masa kata kaw na tsep kawp pru mat hkra galaw sa wa na lam, Laknak hpai ai wuhpung yawng mung shawa asuya n pu kaw sha nga ra na lam, Myen Hpyendap myit ra ka tawn ai 2008 gaw da ai tara hpe dawm shaprai kau lu na lam, Jet ai Federal Munghpawm mungdan langai a matu gawda ai tara ningnan langai byin pru wa lu hkra shakut sa mat na lam, Munghpawm Federal Mungdan gaw de sa wa na lam, Majan n hpan lam a majaw tsin yam hkrum sha lai wa ai mung shawa ni a matu, tara rapra ai lam lu hkra (Transitional Justice) lu hkra hkrang shapraw galaw mat wa na lam rai nga ai.
SCEF ningnan hpaw shabawn wa ai hte rau, dai kaw rai n lawm shi ai kaga mungdaw ginra hkan na laknak hpai rawt malan hpung ni hte Federal Unit ni hpe hkan woi zinlum mat na ngu ai bungli masing jahkrat da ai rai nga ai.
Dai bungli masing ni kaw na, Amyusha laknak lang wunpung law malawng hte hkan hkrum jahta lu ai sha n ga, Mungdan ginra nkau hkan na Federal Unit ni the mung hkan hkrum jahta da lu sai lam chye lu ai.
SCEF hpaw shabawn dat ai hpang, Sagaing Federal Unit, Magwi Federal Unit, Mandalay Federal Unit, hte kaga Tanintarri Federal Unit ni hte hkrum bawngban wa lu sai lam chye lu ai.
Rawt malan wunpung ni yawng the hkan hkrum jahta taw ai sha n ga, Mungdaw, ginra hpe n mahta ai laknak lang wuhpung ni the mung laksan hkrum jahta da lu sai lam chye lu NUG Hkringmang rung hte ni nawn ai Salang langai KNG Shiga dap de n dai zawn tsun dan ai re.
“SCEF hpe hpaw shabawn ai madung yaw shada lam gaw, Myen hpyen dap hpe mung masa kata kaw na shapraw kau lu hkra ngu ai lam hta, pandung bung ai rawt malan hpung ni yawng hpe matsun langai kata kaw jawm gahkyin sa wa na ngu ai yaw shada lam hte maren, ndai laman gaw yawng the hkan hkrum jahta taw ai ga rai nga ai, laknak lang wuhpung yawng ngu na ram hte gaw hkrum ngut sai, ngut na Tai ginra de na Federal Unit ni the mung hkan hkrum lu sai,” nga tsun ai re.
Dai zawn hkan hkrum jahta ai lam hta, Miwa asuya hte mahkri shawn ai laknak lang wuhpung n kau gaw, SCEF kaw shang lawm na rai n manu shi ai lam ni nga ai ngu na bai tsun n htang ai lam ni mung nga ai hpe chye lu ai.
Hpaw shabawn dat ai SCEF maigan kyithkai wuhpung ni gaw Canada zawn mungdan nga mung shawa, asuya ni hte hkrum ai lam mu ai raitim, htingbu mungdan rai nga ai Miwa hte India zawn re mungdan kaba ni hte hkan hkrum shaga ai lam hpe gaw nmu lu shi ai re.
Lai wa sai bat ASEAN Tinyang up lit ang ai, phillipine maigan hkringmang hte Htai Mungdan Maigan hkringmang salang yan hte Thai Mungdan Jarit mayan nga ai laknak lang wuhpung n kau hte hkrum jahta wa ai zawn, SCEF wuhpung the mung Online hku hkrum jahta wa ai hpe mu lu ai re.