Jaksau Sharam Shangun ai Gabaw hte Myitkyina Kaw Mawdaw Sengke Rim Ahkyak La Taw Nga
Jak sau sharam jai lang na matu ngu ai gabaw hte Myitkyina kaw sau bang nna gau ai Mawdaw Sengke ni yawng hpe myen hpyen balik ni ja ja hkan rim ahkyak la hkawm taw ai nga, Myitkyina ginra masha ni tsun ai re.
Bat Hpang (3) ya Dam shani hta, Jaksau bang ai mawdaw Sengke yawng n hkawm lu na rai nna, Bettry sengke sha jawn mai na lam Myen Hpyen asuya n dau da ai re.
Dai n htoi shani hta Asuya rung ni hpe mung yawng pat da ya ai lam chye lu ai.
Myen Hpyen Dap maga ya na zawn mung shawa ni hpe n pru hkawm shangun ai majaw, dai ni na n htoi lam n tsa de masha gadai mung n nga ai lam, Myitkyina ginra na amyu shayi langai KNG de ndai zawn tsun dan wa ai re.
“Dai hpawt manap jau မိုးမလင်းစျေး de gat sa dut ai ni hpe rim hpang ai nga shiga pru ai kaw na, shinggan de gadai n gwi pru hkawm mat sai gaw, dai ni gaw Myo n tsa na Mawdaw lam kaba ni hta hkraw hkraw rai na re,” nga tsun dan ai re.
Dai hpawt manap jau, hprim hpram gat de Sengke hte namlaw nam la[ sa htaw dut ai ni hpe mung, Balik ni hkan shachyut rim wa ai lam nga ai hpe chye lu ai re.
Bat Hpang (3) ya shani, sau bang ai Mawdaw Sengke ni n pru hkawm na lam n dau ai hpang, Gat kaba kaw gat dut ai ni mung n hpaw mat ai lam hte seng na Myitkyina Masat (1) kaw gat dut ai amyu shayi langai mung KNG de ndai zawn tsun dan wa ai re.
“Shata mi kaw Gat lani mi pat ai, rai tim ya gaw bat mi kaw kalang pat ai hku ang wa ai ga rai nga ai, Sengke Mawdaw ni yawng hpe n pru hkawm shangut mat jang gaw, gat dut tim hpa lachyum n pru, gat pat n htoi n masat tim, shi hkrai shi pat ai hku masa re ga rai nga ai,” nga tsun dan ai re.
Sau Sharam jai lang na matu Laban hpang masum ya shani hpe, Asuya rung ni yawng hte Hpaji jawng ni mung yawng pat ai re lam chye lu ai.
Myitkyina Myo kata dai ni lam n tsa masha gadai n pru hkawm mat ai majaw, lusha seng hpaw ai ni sum machyi hkrum ai lam ni mung byin wa ai hpe chye lu ai.
