Mogok ginra de Balawng TNLA dap ni shim lam la ya nna, Myen Hpyen dap ni tsim shang taw nga ai lam ginra masha ni tsun ai re.
Mogok de Myen ni shang wa ai ten, Rawt malan PDF dap maga hkap shingla gasat ai lam n galaw na matu, TNLA dap maga, sadi jaw tsun da ai lam nga ai hpe chye lu ai.
Ndai laman Myen Hpyen la ni Mogok de mayun mayoi rai grai lagyim shang wa ai majaw, Mandalay PDF dap maga na myo shinggan de yen ya taw ai lam ni mung nga ai lam Mogok ginra masha langai KNG de n dai zawn tsun dan wa ai re.
“Shana shagu gau ngwi ngwi shang wa taw nga ai, shawoi balawng ni nga ai shara hkan Myen ni Balawng hking hpun na nga taw sai, n dai laman tsim shang ai 140 ram gaw rai na sai ngu maram ai,” nga tsun dan wa ai re.
Ya ten Mogok muklum kata Myen Hpyen la marai 140 daram shang shara la da sai rai nna, Mung shawa tsa htam shadang 85 ram gaw, Muklum kata na hprawng yen ma sai lam chye lu ai re.
Mogok muklum kata na TNLA Uphkang Salang yawng mung pru mat sai lam chye lu ai.
Balawng TNLA Amu madu kaba တားဘုန်းကျော် hte Dap awn daju တားဟိုပလန် yan Jinghku Rawt malan dap ni hpe Nam Du the Nam San mare kaba ni kaw woi shaga jahkrum nna, Myen Hpyen dap ni hpe TNLA maga shim lam la ya nna, November 30 hte December praw 1 ya shani hta woi shang wa na re majaw, lam lapran dingbai dingna jaw hkap shingla gasat ai lam ni n galaw na matu tsun sang lang dan wa ai nga, PDF rawt malan hpung ni maga tsun da ai re.
TNLA dap maga dai zawn sadi jaw tsun wa ai majaw, PDF Rawt malan dap ni Mogok muklum kata kaw na Muklum shinggan ni de yen ya taw sai re.
Ya ten Mogok muklum na ကျောက်ဖားဂိတ်၊ မြို့မ Balik dap၊ မိုးကုတ်Htawng kaba, ပြောင်းပြင် mare baw, ရတနာရှင် ကျောက် မျက်လုပ်ကွက် shara ni hta, Balawng TNLA the Myen ni pawng na shim lam jahkrat da ai nga, ginra masha ni tsun ai re.
Mogok hpe Balawng dap ni Myen hpyen lata de ap kau ai rai tim, laga PDF rawt malan hpung ni maga na gaw, a tsam htum matut ninghkap shakut mat wa na lam n dau da ai mung rai nga ai.
