Wunpawng Mungdan Shanglawt Asuya Ginjaw Ginra makau grup yin na Myen hpyen dap yawng hpe, KIA htim shagrawt jasan kau lu ai hpang, Na Lung mare mung shawa ni hpe mare buga de bai mai wa nga sai lam, KIO Asuya kaw na tara shang mying jahpan shapru dat ya sai lam ginra masha ni kaw na chye lu ai.
KIO asuya kaw na mare de bai n htang wa na mying jahpan shapru dat ya sai majaw, mare buga bai gaw de sa wa na lam a matu, mare wunli sharawt akyu hpyi hpawng lamang hpe April 27 ya shani Na Lung mare Hkalup Nawku Jawng wang hta wa galaw sai re.
Shaning 13 ning tawn kau da ai mare buga de KIO kaw na tara shang mai wa nga sai lam jahpan shapru dat ya ai hpang, ya na zawn hkyen lajang shajin mat wa ai hte seng nna, mare masha langai KNG de ndai zawn tsun dan wa ai re.
“Anhte mare de wa na lam hte seng na gaw, KIO asuya kaw na mai wa sai mare mying jahpan shapraw dat ya ai majaw, anhte mare masha ni hku na mung yu wa mayu ai grai na taw sai, dai majaw ndai laman mare de wa du kawan nna, mare buga wunli sharawt akyu hpyi hpawng lamang hpe wa galaw ai re.” nga tsun ai re.
Mare de bai n htang wa na lam hte buga gaw sharawt magam bungli lam ni a matu, Mare Return Komiti hpe mung hpaw da lu sai rai nna, mare bai wa na lam hpe dai komiti ni kaw na lit la woi mat na re lam chye lu ai.
Na Lung mare gaw lai wa sai 2011 ning majan ten kaw na Jinghpaw amyu sha ni yawng hprawng shakram kau da ai mare buga kahtawng rai nna, ya 13 ning jan na ai hpang, bai n htang wa na matu hkyen lajang shajin taw ai rai nga ai.
“Anhte Na Lung ni hpyen majan koi yen ai gaw, majan nnan byin wa ai 2011 ning kaw na rai sai, Na Lung mare gaw majan man nan rai nga ai, rai tim 2017, 2018 lam hpaw wa ai kaw na gaw, n kau Shadan Pa mare hkan na zawn re ni gaw wa nga taw sai, rai tim anhte Na Lung kawng de nga ai ni gaw ya du hkra rai nga ai,” nga tsun ai re.
Dai mare hta nga ai Sam amyu sha baw sang ni gaw, hpyen yen ai lam n nga ai sha, shaning shagu tinang yi sun galaw sha na nga taw ai mare buga kahtawng mung rai nga ai.
Na Lung mare hta dai ning laman du hkra, Myen hpyen dap n pu lahta tsang hpaji jawng hpaw sharin taw ai mare kaba langai rai nna, ya du wa na jawng lung shaning hta gaw, KIO a matsun hte hpaji jawng ni hpe matut hpaw sa mat wa na re matut tsun dan wa ai re.
Dai mare kahtawng na ni gaw, lai wa sai 2011 ning hta Laiza makau grup yin, Woi Chyai, Je Yang, Hpum Lung Yang ni de hprawng yen pru wa ai mung rai nga ai.
