Jinghpaw mungdaw Hkawng Lang Hpu ginra e Nhprang htu sha hkyen ai Fortuna Metals company gaw masing hpe jahkring da ai nga nna Jinghpaw mungdaw asuya de laika bang da ai lam chye lu ai.
Jinghpaw Mungdaw asuya a 4 ning laman galaw ai lamang hte seng nna July 17 ya shani Myitkyina e galaw ai shiga dap sanglang hpawng hta tsun mat wa ai lam rai nga ai.
“Chyam na matu htu na matu hpa n galaw lu shi ai. Dai majaw lai wa sai shata kaw sha fortuna limited gaw n dai bungli n galaw sai mungshawa ni a hkau na ni lawm ai , n ta htingra ni lawm ai nga majaw jahkring kau sai nga na lai wa sai shata hta laika shang wa ai.” nga nna Mungdaw Asuya Hkringmang Daju Dr. Hkyet Awng tsun ai re.
Fortuna Metals Company maga bungli jahkring da ai lam lai wa sai shata mi jan hta laika bang da ai raitim, mungdaw asuya hku nna mungshawa hpang de laksan tsun dan ai lam nnga ai sha, ya na zawn shiga dap ni san ai shaloi she tsun dan ai rai nga ai.
Fortuna Metals company gaw 2018 kaw nna Hkawng Lang Hpu ginra e ja hte kaga sut nhprang htu na matu lamu ga eka sen 3 jan hpe asuya hpang de tang shawn da ai lam rai nga ai.
Ndai masing gaw ginra masha ni hte mungdaw kata wuhpung wuhpawng law law lapran brang lang ai lam nnga ai sha n-ga, shingra tara hten za na hpe tsang ai majaw, ginra masha law malawng masing hpe ninghkap taw nga ai lam chye lu ai.
