Myen-KIA Layan Kawng kaw gap hkat
![](https://kachin.kachinnews.com/wp-content/uploads/2019/10/KIA-battalion-36-soldier-on-April-21.jpg)
N gap hkat ai loi na ten, kalang bai Myen asuya dap hte Wunpawng Mungdan Shanglawt Dap (KIA) lapran Lahta Sammung Layan Kawng kaw June 6, bat Kru Ya shana hkying 7 jan kaw nna numdaw 2-lang gap hkat wa sai hpe KIA tsun shagrin ai.
KIA Dapba (6) kata na Dapdung (9) hpyen hpung ni nga ai Muse ginwang Htan Hpa Bum, Layan Kawng de Myen hpyen hpung langai lung wa ai majaw shana gasat gala lam byin wa ai rai nga ai.
“E… dai Hu Hpyet maga kaw na lung wa ai Myen ni gaw… Shanhte Myen ni dai kaw na lung wa ai gaw dung 9 ni na ai majaw sa hkap sin taw ai kaw Myen ni shawng lung wa na dai kaw gasat poi numdaw lahkawng lang byin ai. Ya gaw bai zim taw sai” nga nna KIA Dapba (6) hpyendu langai Bat Kru Ya shana majan ngut ai hpang tsun ai re.
Myen hpyen hpung a dap mying n chye tim, ya ten dai ginra hkan e hpyen masa shamu shamawt hkawm nga ai gaw Tat-ma (88) hte (99) ni re nga nna ginra masha ni tsun ai re.
Gasat gala zim ai hpang, Myen hpyendap maga si hkala nga n nga n chye lu tim tinang KIA maga gaw kadai hpa n byin ai nga, lahta na KIA hpyendu wa tsun ai.
Mungdan kata COVID-19 mungkan ana zinli makawp ninghkap ladaw, jahten sharun hpung ngu masat ai Rahkai AA ni nga ai ginra hta lai, ngam ai amyusha rawt malan hpung ni nga ai ginra ma hkra kaw August shata htum du hkra majan jahkring tawn ai nga, May 9 nhtoi hte tatmadaw ndau tawn ai re.
Raitimung Lahta Sammung e Dingdung Daw Daphpawm hpung mali hta na, KIA jinghkap dap Balawng TNLA hte Kokang MNDAA, ni gaw Myen asuya dap a hkan tam htu gasat hkrum nga ai masa re majaw shani shagu ngu na majan byin nga ai re.